Presidentët Thaçi e Vuçiç po shtyhen me njëri-tjetrin rreth ditës se kur do të dekretohen gjyqtarët e prokurorët nga komuniteti serb të cilët ditë më parë nuk shkuan në Presidencë për dekretim.
Vuçiq ka paralajmëruar për sot ose më së largu për të hënën e ardhshme dekretimin e gjyqtarëve dhe të prokurorëve serbë të veriut.
“Disa vonohen në formimin e Asociacionit të Komunave Serbe katër vjet e gjashtë muaj, nga prilli i 2013-s në qoftë se unë nuk gabohem. Dhe nuk u bie ndërmend që ta bëjnë atë dhe kanë mbështetjen e shumë vendeve të botës. Më mirë të mos më tërheqin për gjuhe”, ka thënë ai.
Por Thaçi këmbëngul se për dekretim vendos ai e jo Beogradi dhe se nuk do bëhet asnjërën prej ditëve që ka deklaruar Vuçiç.
“Dekretimi i gjyqtarëve dhe prokurorëve të komuniteteve joshumicë bëhet vetëm atëherë kur për këtë vendos Presidenti i Kosovës”, thuhet në një përgjigje të Presidencës për mediat kosovare.
Kujtojmë se Thaçi në fillim të kësaj jave ua pati dërguar ftesën gjyqtarëve dhe prokurorëve serbë për t’u betuar para tij, por këta të fundit nuk u paraqiten, me ç’rast i pari i shtetit akuzoi BE-në dhe Serbinë për moszbatim të Marrëveshjes së Gjyqësorit, të arritur gjatë bisedimeve në Bruksel. /tesheshi.com/
