Pak pas shpalljes së lajmit të mirë, se pavarësinë e Kosovës e njohu një tjetër shtet, Singapori, dy zyrtarët më të lartë e kanë cilësuar si një arritje të madhe një fakt të tillë, për fuqizimin e Kosovës në botë.
Në një postim në Twitter, presidenti Hashim Thaçi ka falenderuar Singaporin duke shkruar: “Faleminderit Singapor për njohjen e Kosovës si shtet i pavarur. Shumica e vendeve të Kombeve të Bashkuara e kanë bërë këtë, kështu Kosova po e forcon pozitën e saj në botë”.
Nga ana tjetër, kryeministri i Kosovës, Isa Mustafa ka deklaruar në rrjetin social facebook se për Kosovën sot ka patur “dy gëzime në një ditë”.
“Po e mbyllim ditën e sotme me dy lajme shumë të mira për vendin tonë. Republika e Kosovës është njohur zyrtarisht nga Republika e Singaporit dhe dy shtetet tona do të vendosin marrëdhënie diplomatike. Kjo njohje e çon në 113 numrin e vendeveqë e njohin pavarësinë e Kosovës duke pasur rol të rëndësishëm në fuqizimin e shtetësisë dhe të subjektivitetit ndërkombëtar të shtetit tonë. Lajm shumë i mirë është edhe ratifikimi në Kuvendin e Kosovës i Marrëveshjes financiare për IPA 2015 ndërmjet Kosovës dhe Bashkimit Evropian, e cila i mundëson Kosovës përfitimin e 78 milionë eurove, të cilat do të përdoren për hapjen e vendeve të reja të punës, zhvillimin ekonomik, luftën kundër korrupsionit dhe fuqizimin e mëtejmë të qeverisjes së mirë. Kosova po ecën fuqishëm në rrugën e forcimit dhe zhvillimit të saj të gjithanshëm. T’i gëzohemi të gjithë sukseseve tona të përbashkëta e të njëpasnjëshme që po i arrijmë”, ka shkruar Mustafa./tesheshi.com/
