Presidenti Thaçi dekretoi Avdullah Hotin e LDK-së për kryeministër të ri, duke thënë se e ndërmerr këtë hap pas një letre nga Isa Mustafa i cili e ka siguruar për shumicën e nevojshme parlamentare.
“Pas letrave që i kam drejtuar kryetarit të LDK-së, praktikë kjo e mëhershme drejtuar edhe partisë që ka dalë e para në zgjedhjet e 6 tetorit, sot kam marrë një letër nga kryetari i LDK-së Isa Mustafa përmes së cilës ai konfirmon se i mbështet të gjitha kriteret mbizotëruese për krijimin e qeverisë së re, duke përfshirë edhe kriterin e sigurimit të shumicës parlamentare për qeverinë e re – shumicë që m’u dëshmua sot edhe faktikisht”, shkruan Thaçi.
“Në përputhje me këtë letër, ju informoj se sapo kam dekretuar Avdullah Hotin si të nominuar për kryeministër të ri të Qeverisë së Kosovës. Në ditët në vijim, një tjetër qeveri e re mund të votohet në Kuvendin e Kosovës, sërish në përputhje të plotë me Kushtetutën dhe me rendin demokratik të Republikës sonë duke marrë parasysh legjitimitetin e qartë nga deputetët e Kuvendit të Kosovës dhe nga zotimi që u dëshmua sot i shumicës së re parlamentare të dalë nga zgjedhjet e 6 tetorit”, përfundon deklarata e kreut të shtetit të Kosovës.
Qeveria e re pritet te marrë votëbesimin në seancën e së shtunës në Kuvendin e Kosovës. /tesheshi.com/
