Presidenti Thaçi pretendon se Albin Kurti po mban paligjshmërisht e në uzurpim të plotë, postin e kryeministrit, e kjo pas rrëzimit me mocion mosbesimi.
“Për fat të keq, kemi një njeri që i ka uzurpuar zyrat e kryeministrit edhe pas dy shkeljeve të rënda kushtetuese, po sillet si njeri i paligjshëm në skenën politike kosovare.
Mirëpo sido që të jetë ne duhet të kemi durim, duhet që qartësisht të punojmë por edhe të respektojmë kushdo që të jetë në krye të çdo institucioni apo spektri politik, të punojmë që të respektohet vendimi i Gjykatës Kushtetuese që pritet të dalë në ditët në vijim”, ka thënë Thaçi, referuar asaj çfarë do vendoset në lidhje me zëvëndësimin ose jo të Kurtit me Abdullah Hotin e mandatuar.
“Ne duhet të presim vendimin e Gjykatës Kushtetuese dhe pastaj t’i japim opinionet tona. E gjithë bota e din që vendimet e gjykatave duhet të respektohen dhe unë i kam respektuar gjithmonë edhe kur më kanë pëlqyer edhe kur nuk më kanë pëlqyer fare. Askush nuk është mbi Kushtetutën e ligjet e vendit”, u shpreh kreu i shtetit të Kosovës.
Nga ana tjetër, Kurti që është për zgjedhje të tjera të parakohshme, e sheh zgjidhjen pikërisht te to.
“Ngërç institucional? Nuk është e vërtetë. Mospajtime ka, por edhe zgjidhje ka. Në përputhje me Kushtetutën tonë nevojiten zgjedhje të reja. Ato tashmë po mbahen anembanë Evropës.
Pas shëndetit të popullsisë dhe ekonomisë, është në pyetje edhe shëndeti i demokracisë. Zgjedhje do të ketë në qershor në Islandë, Francë dhe Serbi, kurse në korrik në Maqedoninë e Veriut, Spanjë dhe Kroaci. Duhet të kemi zgjedhje edhe në Kosovë e aso lokale në Podujevë. Madje, mundet edhe njëkohësisht”, shkroi Kurti. /tesheshi.com/
