Zv.kryeministri dhe ministri i Punëve të Jashtme të Kosovës, Hashim Thaçi në 95 vjetorin e Kongresit të Lushnjës, ka thënë se atë vit shqiptarët u mblodhën për të shpëtuar vendin dhe për të dëbuar armiqtë.
Ai në një postim në Facebook ka shkruar se ky kongres përbën një faqe me rëndësi të veçantë për shqiptarët dhe një moment historik.
Postimi i Thaçit në Facebook:
95 vite më parë nisën punimet e Kongresit të Lushnjës ku udhëheqësit shqiptarë u mblodhën për të shpëtuar vendin dhe dëbuar armiqtë. Kongresi i Lushnjës përbën një faqe të ndritur me rëndësi të veçantë për historinë e popullit tonë, sepse konsolidoi shtetin shqiptar dhe i vuri fre armiqve që pretendonin copëtimin dhe gllabërimin e shtetit shqiptar të parashikuar nga Traktati i Fshehtë i Londrës.
Kjo ngjarje shërben si një dëshmi historike e pakontestueshme e aftësive shtet-formuese të popullit tonë pasi u organizua tërësisht nga shqiptarët në mungesë totale të ndihmës nga jashtë. Armiqtë e shtetit shqiptar kanë mbajtur tradicionalisht një qëndrim nënçmues ndaj aftësive shtetformuese dhe shtetvepruese të shqiptarëve dhe Kuvendi Shpëtimtar i Lushnjës tregoi se shqiptarët në kohë të vështira dinë të bashkohen për interesin e vendit duke lënë mënjanë ambiciet meskine për pushtet dhe hatërmbetjet personale.
Ky moment historik jo vetëm është burim krenarie por duhet të shërbejë edhe sot si model frymëzimi për të gjithë aktorët politikë të tashëm dhe të ardhshëm për të kuptuar se interesi i vendit qëndron mbi interesat personale e partiake. HTH
/tesheshi.com/
