Presidenti i Kosovës Hashim Thaçi tha në Bruksel se udhëheqja e re e Bashkimit Evropian duhet të dëshmojë se është një partner i qëndrueshëm i rajonit të Ballkanit Perëndimor, i cili, sipas vlerësimit të tij, është në një udhëkryq politik dhe historik,.
Duke marrë pjesë në Konferencën vjetore të Ballkanit Perëndimor të organizuar nga Miqtë e Evropës, Thaçi theksoi se një perspektivë e qartë evropiane është thelbësore për të garantuar paqen dhe stabilitetin afatgjatë në rajon.
Ai shtoi se lidershipi i ri i Unionit duhet të dëshmojë vizionin, guximin dhe udhëheqjen e tij, duke mbajtur premtimet për vendet e Ballkanit Perëndimor dhe duke dëshmuar se është një partner i qëndrueshëm i vendeve të rajonit.
Shtyrja dhe vonesa e zgjerimit të BE, sipas presidentit të Kosovës, “në fakt është një thirrje për kaos të ri në Ballkan”.
Duke folur për perspektivën evropiane të Kosovës, Thaçi tha se liberalizimi i vizave për Kosovën duhet të kishte ndodhur sa më shpejt që të jetë e mundur sepse Kosova i ka përmbushur të gjitha kriteret dhe qytetarët po izolohen padrejtësisht.
Presidenti i Kosovës gjithashtu tha që marrëveshja mes Kosovës dhe Serbisë duhet të sjellë njohje për Kosovën dhe një perspektivë të qartë në rrugën e integrimeve europiane. /tesheshi.com/
