Nga Blendi Gashi
Kryetarit të Gjykatës Themelore të Prishtinës Hamdi Ibrahimi i është djegur vetura zyrtare e tipit ‘Range Rover’, mbrëmë rreth orës 23:00 në qytetin e Podujevës, ku edhe jeton, afër banesës së tij.
Rastin e ka konfirmuar vetë Ibrahimi për mediat, derisa është kursyer nga vlerësimet për shkak të pozitës që mban.
Ai ka thënë se nuk ishte vetura e tij personale, por zyrtare, që e kishte parkuar para banesës së tij në Podujevë.
Përderisa, vetë Ibrahimi ka thënë se veturën ia dogjën për arsye se merret me raste të rënda, por duke mos dashur të drejtoi gishtin ndaj askujt, një gjë të tillë nuk e ka bërë ish zëvendëskryeministri Hashim Thaçi i cili e ka ndërlidhur djegien e veturës së kryetarit të Gjykatës Themelore të Prishtinës me veprimet e fundit të opozitës në Kuvend.
“E papranueshme djegia e veturës zyrtare të kryetarit të Gjykatës Themelore të Prishtinës, për ata që ia duan të mirën Kosovës. Ky është edhe një sulm tjetër kundër institucioneve të shtetit dhe presion mbi organet e pavarura të Republikës së Kosovës. Me këto veprime të kundërligjshme, grupe të caktuara të motivuara politikisht, po mundohen t’i frikësojnë bartësit e këtyre institucioneve dhe t’i destabilizojnë strukturat themelore shtetërore, politike e kushtetuese të Republikës së Kosovës. Këto veprime politike, që po e cenojnë rendin publik, janë vazhdimësi e veprimeve të atyre që po e cenojnë rendin kushtetues në Kuvendin e Kosovës. As shteti dhe as pushteti nuk fitohen dhe ndërtohen me dhunë, por me respektimin e vullnetit të popullit, me respektimin e ligjeve, me dialog, durim, punë dhe përkushtim!”, ka qenë reagimi i Thaçit përmes një postimi bërë në Facebook.
Opozita i kundërpërgjigjet Thaçit
Portali mbarëkombëtarë tesheshi.com ka kontaktuar me opozitën pas akuzave të bëra nga Thaçi se vetura është djegur prej tyre.
Frashër Krasniqi, zëdhënës i Lëvizjes ‘Vetëvendosje’, ka mohuar që VV të jetë e lidhur me rastin në fjalë.
“Lëvizja ‘Vetëvendosje’ çdo veprim e bënë publik. Ne nuk kemi lidhje me këtë ngjarje, ndërsa me shpifjet e Thaçit nuk çuditet askush”, ka thënë Krasniqi në një prononcim pë tesheshi.com.
Zëdhënësi i AAK-së Muharrem Nitaj në një prononcim për tesheshi.com thotë se partia e tyre nuk e ka idenë se çfarë po flet Thaçi por njëkohësisht nuk e kanë idenë se kush mund të qëndroj prapa djegies së veturës së kryegjyqtarit Ibrahimi.
“Është një akt i shëmtuar dhe kushdo që e ka bërë këtë duhet të denohet. Hetuesia duhet t’i gjejë kryesit e kësaj vepre sa më pare, ndërkaq Thaçi është mirë që këtë punë t’ua lërë atyre që duhet të merren me të”, ka deklaruar Nitaj.
Ndryshe, gjatë përplasje së opozitës me policinë në protestat që kanë ndodhur kryesisht muajin e fundit janë djegur disa vetura zyrtare.
/tesheshi.com/
