Gazetari i njohur kosovar i karrierës, Nexhmedin Spahiu, një mitrovicar mbi të gjitha, është nga ata që mbron inisiativën e Kurtit për të shtrirë sovranitetin e shtetit kosovar dhe në veriun ku ligjin e bëjnë bandat serbe. Por më shumë se kaq, ai e mbron këtë lëvizje të Prishtinës dhe në “injorim” të thirrjeve ndërkombëtare, duke sjellë një referencë krahasuese nga e shkuara historike.
Sipas tij, ajo që po bën qeveria Kurti sot, ngjan me Luftën e Vlorës dje, përcaktuese në sovranitetin e Shqipërisë, pavarësimin e saj, më shumë se vetë pavarësia si akt po në Vlorë.
“Deri më tani kemi një rezultat ku ai ka avancuar në përmbylljen e sovranitetit të Kosovës. Ka domethënie të madhe që flamuri i Kosovës vendoset edhe në veri të saj.
Unë këtë e kam krahasuar më Luftën e Vlorës në vitin 1920. Sepse deri në Luftën e Vlorës shteti shqiptar e kishte ekzistencën e tij në pikëpyetje dhe e kishin gjithë botën kundër. Madje edhe familjet që kontribuan më shumë për pavarësinë ishin kundër.
Unë nuk mund të them se Eqerem bej Vlora nuk ishte patriot por ai e mbarti këtë peng gjithë jetën sepse ata nuk e përkrahën pasi menduan se ishte një ngritje koke”, arsyetoi Nexhmedin Spahiu në një intervistë në Euronews. Dhe sipas tij, “në rastin më të mirë Edi Rama është si Eqerem bej Vlora”.
Për gazetarin e njohur mitrovicar, edhe Lufta e Vlorës nuk pati përkrahje ndërkombëtare. /tesheshi.com/
