Shtabi i emergjencës në komunën e Tetovës konstatoi dëme të mëdha nga përmbytjet në mbledhjen e tij të mëngjesit. Gjendja në terren nga përmbytjet duket e rëndë, e sipas shtabit, fshati Shipkovicë është venbanimi më i prekur.
Shtabi i emergjencës në këtë fshat ka konstatuar 3 persona të vdekur, 1 person llogaritet si i humbur, kurse 13 qytetarë rezultojnë të lënduar.
Ndihma e shpejtë është e pozicionuar në fshat dhe do të jetë në shërbim të qytetarëve 24 orë.
Ekipet e Ushtrisë dhe drejtorisë së Emergjencave janë në kërkim të një vogëlusheje e cila rezulton e humbur. Në fshat mungon energjia elektrike.
Në Reçicë të Madhe, sipas të dhënave, 3 lagje dhe afër 100 shtëpi janë të dëmtuara nga vërshimet e përrenjve që rrjedhin mes fshatit. Në fshat janë riparuar dëmtimet në sistemin e energjisë, por uji i pijshëm nuk mund të konsumohet deri në kryerjen e analizave.
Në fshatin Poroj ka ende rrugë të bllokuara nga vërshimet dhe dëmtime në sistemin e ujësjellësit.
Rruga e Banjës është e pakalueshme në gjysmën e saj për shkak të dëmtimit. Sipsa të dhënave, mbi 21 automjete janë të bllokuara në pjesën e sipërme të rrugës por njerëzit janë të evakuar dhe jashtë rrezikut.
Në qytetin e Tetovës, sipas Shtabit të Emergjencave, gjendja është e kënaqshme.
Komuna e Tetovës apeloi qytetarët e zonave të prekura nga vërshimet që të shmangin pirjen e ujit nga sistemi i ujësjellësit deri në vërtetimin e situatës mikrobiologjike.
Shtabi i Emergjencës u bëri thirrje qytetarëve të angazhohen për të ndihmuar në çdo formë të gjithë ata që në këto kohëra të vështira kanë nevojë për ndihmë, kanë humbur të dashurit e tyre, apo janë zhvendosur nga shtëpitë. “Situata të këtilla kërkojnë angazhim nga të gjithë ne, me qëllim kthimin e normalitetit në komunën tone”, thuhet në njoftimin e shtabit. /tesheshi.com/
