Pas krijimit të të ashtuquajturit “Sputnik amerikan”, apo fondit të Uashingtonit në Ballkan për t’ju kundërvënë propagandës ruse, edhe Bashkimi Europian pritet të lëvizjë me hapa të shpejtë në këtë drejtim.
Ditën e djeshme, 8 ministra të Jashtëm të vendeve të BE-së i kanë shkruar një letër zyrtare nr.1 të diplomacisë dhe sigurisë europiane, ku i kërkojnë aktivizimin sa më shpejtë të një fondi të madh anti-propagande.
Është interesant fakti se, edhe pse Britania e Madhe me Brexit-in e saj është realisht jashtë klubit të Europës politike, në kuadër të luftës me Rusinë, Londra zyrtare po synon të mbajë primatin, siç ndodhi një vit më parë me përpjekjen për grusht shteti në Podgoricë, ku pjesën më të madhe të barrës së zbulimit me mbajti MI5-a britanike.
Edhe në këtë rast, Boris Johnson, shefi i diplomacisë së Madhërisë së Saj, është një nga firmëtarët e dokumentit zyrtar.
Tetë vendet anëtare të BE-së, në letrën e tyre i kërkojnë Brukselit që të ndërmerret një fushatë reale dhe jo vetëm një sulm blitz kundër propagandës ruse, e në mënyrë speciale për Ballkanin Perëndimor.
Siç bën të ditur gazeta kroate Jutarnji List, letra ka mbërritur në zyrën e kreut të diplomacisë europiane, Federica Mogherini.
Kroacia është një nga firmosësit, ndërkohë që firmat e tjera janë Çekia, Letonia, Lituania, Polonia, Rumania, Suedia dhe Mbretëria e Bashkuar.
Këta vende në letrën e tyre kanë theksuar se Sputnik-u por edhe Rusia Today, janë bërë mjete të fuqishme invazive të lajmit të sajuar, ndryshe fake news, duke shkaktuar turbullira të situatave politike brenda vendeve përkatëse.
Sputnik, portali gjigand i Kremlinit ka seksionet e saj thuajse në të gjitha gjuhët europiane dhe depërton fuqishëm me shkrime që përgjithësisht janë analiza që godasin SHBA dhe NATO-n por edhe frymëzojnë e ndihmojnë qarqet izolacioniste dhe të së djathtës.
Ndërkaq, Rusia Today është në gjuhën angleze, por ka një përhapje shumë të fuqishme me korrespondentë e lidhje direkte nga zonat e nxehta.
Ministrat e Jashtëm të 8 vendeve të BE-së theksojnë se Ballkani rrezikohet shumë nga majisja ditë pas dite e një opinion politik jo real, por që ndihmon frymën anti-europiane në shtetet e rajonit.
Në Bruksel, Federica Mogherini ka ngritur prej një viti zyrën e StratCom e cila ka detyrë të gjejë dhe të zhbëjë gënjeshtrat e hapura nga propaganda ruse.
StratCom ka hartuar një raport special për Ballkanin ku thekson se propaganda ruse nuk hyn vetëm nëpërmjet Sputnik-ut, por ka disa rrugë të tjera nëpër media të vendeve ballkanike, ku në rrugë terciare, pra nga aleatët e Moskës apo organizata të ndryshme humanitare, paguhen portale të ndryshme për të sulmuar forcat pro-europeiste dhe për të krijuar një mosbesim ndaj integrimit euroatlantik.
Në pllakatin qëndror që StratCom ka publikuar në raport, theksohet se “Sputnik dhe RT japin gjithçka tjetër veçse asnjëherë lajmet reale që vijnë nga vendi i tyre.
Thelbi i kësaj strategjie është: Mohimi i gjithçkaje dhe çorientimi i situatës duke vendosur palët kundër njera-tjetrës”.
StratCom ka publikuar edhe një material prej 103 faqesh të shpërndara nga Ministria e Jashtme e Rusisë për punonjësit e Sputnik-ut, ku i kërkohet të mbrojë interesat e Federatës Ruse.
Pritet që javën e ardhshme në Bruksel të shpërndahen fondet për vendet e Ballkanit, në mënyrë që të nisë kundërfushata ndaj rusëve.
Ende nuk është e qartë nëse fondet do të shpërndahet në mediat respektive apo do të krijohet ndonjë portal i ngjashëm me Sputnik-un dhe Rusia Today.
Sputnik-u rus që vepron në 30 gjuhë të botës në Ballkan ka seksionet në gjuhën serbo-kroate, greke, bullgare, rumune, por jo gjuhën shqipe.
Realitetin shqiptar, portal i kremlinit e trajton në tërësi për të gjitha trojet dhe sulmon ashpër prej katër vitesh krerët e qeverisë shqiptare, në veçanti Edi Ramën, por edhe Hashim Thaçin, Ramush Haradinajn, Albin Kurtin dhe liderë të tjerë.
Këtë mbulim të gjerë për shqiptaret e ka të inkorporuar në seksionin e gjuhës serbe.
Përgatiti Ylli – Pata /tesheshi.com/
