Testimi ekstern për nxënësit e shkollave fillore dhe ato të mesme, është shoqëruar me skandale të shumta dhe reagime të prindërve për pyetjet e palogjikshme, të cilave duhet tu përgjigjen nxënësit. Këto pyetje në disa raste janë edhe raciste, siç është shembulli me pyetjen në vijim.
“Prindërit nuk e lëshojnë Agimin të shkojë në shkollë. Mendojnë se si më i moshuar prej të gjithë vëllezërve dhe motrave duhet të kujdeset për lopët në mal. Ky vendim i prindërve të Agimit quhet?” apo një tjetër shembull me nxënësit maqedonas:
“Tomçe është nxënës më i mirë për atë kujdestari i klasës e ka propozuar për kryetarë të klasës së VIII/2. Nxënësit fshehurazi dhe me shumicë votash e kanë zgjedhur Tomçen për kryetar. Vallë ka procedura jodemokratike gjatë zgjedhjes së Tomçës?”.
Kjo pyetje e parashtruar, për përfaquesit e shoqatave të arsimtarëve shqiptarë ushqen paragjykime dhe segregacion që i paraqet shqiptarët si “lopçarë” kurse maqedonasit të predispozuar të jenë “kryetarë”.
Kryetari i Lidhjes së Arsimtarëve Shqiptarë, Nuhi Dardhishta, thotë se është koha e fundit kur duhet të kërkohet përgjegjësi profesionale dhe morale nga të gjithë.
“Përgjegjësia duhet të jetë piramidale, duke nis nga hartuesit e pyetjeve, përkthyesit, mësimdhënësit, shkollat, prindërit e deri te Byroja dhe Ministria e Arsimit” , shprehet, ai.
Prindërit nga ana tjetër, ankohen se disa nga pyetjet e parashtruara nuk janë fare në materialet mësimore. “Pas konsultave me profesorin e klasës, kuptova se për një pyetje janë dhënë katër opcione nga të cilët asnjëri nuk është i saktë”, thotë një prind i habitur.
Që konfuzioni të jetë akoma më i madh, nxënësve të klasës së nëntë u është parashtruar pyetje nga sfera e diplomacisë: “Si zgjidhet problemi me emrin e shtetit: a) diplomaci, b) kompromis, c) marrëveshje”, thotë pyetja.
E tillë është edhe pyetja: “Cilat planete i ka parë Dante me të dalë nga ferri dhe çka simbolizojnë ato?”, që për njohësit e e kësaj problematike paraqet pyetje që nuk përkon me realitetin pasi siç thonë, nxënësit e vitit të dytë mund të përgjigjen në këtë pyetje vetëm nëse e kanë të lexuar “Komedinë Hyjnore” të versioneve më të vjetra, ose nëse profesori i lëndës ta këtë përmendur gjatë ligjërimit.
Testimi ekstern në të cilin janë përfshirë mbi 180 mijë nxënës fillorist dhe të shkollave të mesme pritet të përfundojë më 10 qershor dhe ka qenë në shënjestër të kritikëve, të cilët e kanë cilësuar si reformë të keqe në arsim, madje u shoqërua me protesta të nxënësve, por pa ndonjë sukses.
Ditë më parë, lideri opozitar Zoran Zaev paralajmëroi se me të ardhur në pushtet, partia e tij do ta shfuqizojë ligjin për arsim me të cilin parashihet testimi ekstern./tesheshi.com/
