Prova e fundit raketore e Koresë së Veriut ka ndarë në qëndrime fuqitë botërore, të cilat, vetëm pak ditë më parë, miratuan sanksione të reja kundër Phenianit në Këshillin e Sigurimit të Kombeve të Bashkuara.
SHBA tha se barra e reagimit ndaj Koresë së Veriut duhet të bjerë mbi Kinën, aleaten e saj kryesore, dhe Rusinë, e cila po ashtu ka lidhje me shtetin komunist.
Kina tha se SHBA është duke u shmangur nga përgjegjësia e saj.
Rusia e dënoi retorikën agresive të Uashingtonit, por edhe “veprimin provokues” të Phenianit.
“Rusia është thellësisht e shqetësuar me provokimin e fundit, i cili mund të rrisë tensionet në Gadishullin Korean”, tha zëdhënësi i Kremlinit, Dmitry Peskov.
Raketa e hedhur të premten mbi Japoni ka pasur kapacitet për të goditur territorin e Shteteve të Bashkuara, ishullin Guam.
Ushtria jugkoreane tha se raketa ka arritur lartësinë prej 770 kilometrash dhe ka udhëtuar 3,700 kilometra përpara se të binte në Detin Hokaido.
Më 3 shtator, Koreja e Veriut ka testuar bombë hidrogjeni. /tesheshi.com/
