Këto ditë që ka rishpërthyer një debat publik mbi komunitetin LGBT, ku si shkak ka qenë prania e tyre në disa shkolla të mesme të kryeqytetit, thënë zyrtarisht me mision informues mbi ata vetë e bulizmin, ku segmente të këtij debati kanë prekur padyshim dhe politikën.
Dhe, duke qenë se në rrjete sociale, aty ku konsumohet dhe debati më i madh, gjenden dhe ushtritë e militantëve të të dyja kahjeve, është vënë re që kahja e PD-së ka qenë më komode në denoncimin politik, edhe erotik bashkë të asaj të PS-së, meqë në dorë ka dhe foto kompromentuese, në njërën Rama me dy personazhet e njohura LGBT e në tjetrën ajo me dy figura ish-mjaftiste sot në pushtet, dalë në vite më parë në një festë rinore në pozicione të “dyshimta”.
Gjithashtu, ka patur dhe zëra më zyrtarë nga radhët e PD-së, siç Tritan Shehu apo Orjola Pampuri, të cilët janë shprehur kundër pranisë në shkolla të këtij komuniteti, ndonëse kjo e fundit pak kohë më parë është deklaruar pro njohjes së martesës mes tyre. Ama zë plotësisht zyrtar nga ana e PD-së si parti e cila e identifikon veten si e djathtë, nuk ka.
Për më tepër, fotos së Ramës me dy personazhet i rëndon në krahun tjetër dhe ajo e Berishës, ku diferenca është vetëm në çehren e tyre dhe në pozicionin fizik: i pari krahëqafë me ta, i dyti si i zënë në hall.
Deri më sot nuk ka patur asnjë qëndrim të PD-së rreth tyre, jo duke iu referuar kleçkës erotike por protagonizmit të tyre publik, i cili qartazi cenon disa standarte barazie dhe i shndërron ata nga të (vet)diskriminuar në diskriminues.
A duhej të kishte? Doemos që po. Në bazë të pozicionimit ideologjik. Një e djathtë nuk mund ta honeps që LGBT-të të bëjnë gili-vili mbi normat dhe etikën publike kur cenohen vlerat tradicionale.
Madje dhe në emër të luftës së rëndomtë politike, kur kjo opozitë e djathtë i është vënë mazhorancës me gur në trastë për çdo gjë, është e habitshme se si për çështjen me sensitet të madh publik zgjedh të heshtë. Droje nga SHBA? Çudi se një droje të tillë nuk e ka shfaqur tek aspektet e reformës në drejtësi. I rëndë ky selektivitet nga ana e opozitës.
Ndërkohë, kujtojmë se dhe kur i ka ardhur një propozim ligjor nga një OJQ mbi këtë komunitet, këtu e vite më parë kur ishte në pushtet, ka treguar një luajalitet të papranueshëm për një të djathtë.
Ky në fakt është debat 27-vjeçar, që kur nisi pluralizmi, nëse PD është apo jo e djathtë. Dhe dritëhija më e madhe ndaj saj mbi profilin politik ka të bëjë pikërisht më qëndrimin karshi këtij komuniteti. Dhe ky është rasti për ta ditur, nëse është apo jo e djathtë dhe nëse do vijojë të jetë kështu apo ashtu në të ardhmen.
Testi quhet LGBT…/tesheshi.com/
