Tesla, firma e njohur amerikane e prodhimit të makinave elektrike, ka bërë të njohur një “bateri shtëpie”, e cila mund të vendoset kudo në shtëpi dhe ta bëjë atë të pavarur nga rrjeti i energjisë elektrike.
Elon Musk, shefi ekzekutiv i kompanisë amerikane, tha se kjo bateri do të ndihmonte në ndryshimin e tërë infrastrukturës së energjisë në botë.
E quajtur Tesla Powerwall, bateria mund të akumulojë energjinë e paneleve diellore, të rrjetit të energjisë elektrike gjatë natës, kur energjia është dhe më e lirë, e të sigurojë furnizim gjatë ndërprerjeve të energjisë.
Bateria, e cila mund të vihet brenda shtëpisë apo në garazh, mund t’i bëjë teorikisht shtëpitë e furnizuara me energji diellore plotësisht të pavarura nga rrjeti tradicional i energjisë elektrike.
Sipas Musk-ut, synimi është transformimi i tërë infrastrukturës energjitike të botës, dhe gjatë paraqitjes së baterive në një aktivitet të zhvilluar posaçërisht për to, i përshkroi si një “skulpturë të bukur në mur”.
E gjithë energjia për aktivitetin e zhvilluar në mbrëmje u sigurua nga bateritë e reja.
Bateritë do të kushtojnë 3.500 dollarë dhe do të dalin në treg së pari në SHBA gjatë këtij viti, por vitin pasardhës synohet të shiten dhe në pjesë të tjera të botës.
Gjithnjë sipas Musk-ut, si një treg kyç për produktin është parë Gjermania. /tesheshi.com/
