Sulmet e fundjavës së kaluar në SHBA me 38 të plagosur, janë dëshmi e ekzistencës së kërcënimeve të reja difuze – të thjeshta, të papërsosura, me të cilat policia dhe inteligjenca do ta ketë të vështirë të ballafaqohet, thonë ekspertët. Pesëmbëdhjetë vite pas sulmeve të 11 shtatorit, të cilat janë planifikuar me muaj nga rrjeti i përpunuar i cili ka vepruar nga jashtë, shërbimet anti-terroriste po ballafaqohen me rrezikun i cili tashmë ka ndryshuar formën.
Tani sulmuesit janë amerikanë, individë apo në grupe që shpesh kanë kontakte me organizata të armatosura të rrezikshme, vetëm nëpër rrjete interneti apo rrjetet sociale.
Interneti për ta është “djalli mbi shpatull, i cili ju pëshpërit vazhdimisht: “Vrit, vrit!”, thotë drejtori i FBI James Comey.
”Këta individë është vështirë të zbulohen”, ka thënë Lorenzo Vidino, nga Qendra për Studime mbi sigurinë e brendshme në Universitetin George Ëashington.
“Madje, edhe në qoftë se i zbuloni, çfarë mund të bëni? Nuk mund ta përcjellim dikë ditë dhe natë, shtatë ditë në javë, vetëm pse është aktiv nëpër rrjete sociale të cilat i përdorin grupet e rrezikshme për të përhapur mesazhet e tyre”, ka thënë ai.
Metoda e pazhvilluara
Metodat të cilat përdoren sot janë të pazhvilluara, siç është rasti i sulmit me thikë në Minnesota ose zinxhiri i shpërthimeve të cilat ndodhën të shtunën mbrëma në Nju Jork.
Por, edhe veprime të tilla janë potencialisht vdekjeprurëse dhe të mjaftueshme për të shkaktuar panik, për të traumatizuar njerëzit dhe për të futur dyshimin helmues ndaj komunitetit musliman.
Të mjegulluara mbeten motivet prapa sulmit të Ahmed Khan Rahamit, 28-vjeçarit amerikan me prejardhje afgane, të dyshuar për sulm në Nju Jork, i cili është arrestuar dje.
“Është shumë e mundur që sulmet nuk kanë të bëjnë me grupin Islamik të Irakut dhe Levantit ose Al Kaidan”, tha të hënën veterani i FBI, Ali Soufan, pronar i kompanisë për analiza të rreziqeve të sigurisë.
“Mjafton një grup i aktorëve ekstremistë vendorë në SHBA për thirrje të tilla për të kryer vrasje”, shtoi ai.
“Radikalizmi i përbashkët”
“Tashmë kemi parë në Nju Jork apo New Jersey grupe të vogla njerëzish të cilët janë radikalizuar së bashku, janë kryer tashmë disa hetime të këtij lloji të kryer nga FBI”, thotë Lorenzo Vidino.
Sulmi me thikë në një qendër tregtare me nëntë të plagosur është marrë përsipër nga ana e ISIS-it, dhe atë mu në Minnesota e cila është vlerësuar për përpjekjet për parandalim të radikalizmit.
Në Minnesota, shërbimet civile të SHBA – policisë, arsimit dhe pushtetit lokal, kanë rritur kontaktet me emigrantët nga Somalia të cilët bëjnë pjesë ndër grupet më pak të integruara në SHBA.
Ata përpiqen që të ndërtojnë lidhje besimi me të moshuarit, prindërit dhe udhëheqësit e këtij komuniteti.
“Por programe të tilla vetëm mund të kufizojnë kërcënimin, por jo edhe ta eliminojnë atë në tërësi”, tha Lorenzo Vidino.
Para një kërcënimi të këtillë difuz, zyrtarët e shërbimeve antiterroriste të SHBA kërkojnë për gjëra shumë të veçanta në gjerësitë e internetit dhe të fuqive politike: që të mos lejojnë përhapjen e teknikave të kodimit, ndërkohë që përgjojnë komunikimet e këtilla që janë me rëndësi të madhe për të mësuar në lidhje me akterët e grupeve të këtilla të rrezikshme dhe të simpatizantëve të tyre.
“Këtu teknologjia i jep përparësi pjesëtarëve të grupeve të armatosura”, thotë me keqardhje Nick Rasmussen, drejtor i Qendrës kombëtare anti-terroriste amerikane, e cila lidh CIA-n, FBI dhe agjencitë tjera të sigurisë së SHBA-ve.
“Ne jemi në errësirë gjatë kohës sa po hetojmë vendin në të cilin ndodhen ekstremistët potencialë”, thotë Comey. /tesheshi.com/
