Mjekër e gjatë dhe e çrregullt e flokë të pa krehur. Kështu shfaqet Salah Abdeslam, terroristi i fundit që mori pjesë në sulmin terrorist që gjunjëzoi Parisin natën e 13 nëntorit të vitit të shkuar.
Ai është kapur gjatë javëve të kaluara në lagjen Molenbeek në Bruksel, ndërsa në këtë fotografi që shikoni më poshtë gjendet brenda burgut në Bruges, ku është ndaluar. Fotografia është publikuar nga e përditshmja belge Het Nieuwsblad.
Salah shfaqet i lodhur dhe shumë më ndryshe nga fotografia e mëparshme e shpërndarë në media nga autoritetet, kur ai ishte ende në kërkim. Në atë fotografi dukej mjaft i rregullt, i ruajtur, me flokët e krehur dhe të rregulluar me xhel. Në imazhet e reja terroristi duket i veshur me një xhaketë, i dobësuar, i lodhur e me rrathë të zinj rreth syve.
Siç shkruhet në të përditshmen, e cila rrëfen dëshminë në burg të Abdeslam, ai mbahet si një “i dënuar model”. Megjithatë, edhe pse është në një burg të sigurisë së lartë, rojet shkojnë dhe e vizitojnë herë pas here, për tu siguruar që ai është aty. /tesheshi.com/
