Kancelari austriak Sebastian Kurz tha të hënën në mbrëmje se Vjena kishte qenë shënjestra e një sulmi të egër terrorist, duke shtuar se ushtria kishte dalë në rrugë dhe kishte mbrojtur kryeqytetin në mënyrë që policia të përqendrohej në operacionet kundër terrorizmit.
“Ne aktualisht po kalojmë orë të vështira në republikën tonë. Unë falënderoj forcat e sigurisë që po rrezikojnë jetën e tyre. Policia do të veprojë me vendosmëri kundër autorëve të sulmit të egër,” tha Kurz.
Të paktën dy persona, përfshirë sulmuesin, u vranë në sulmet e njëkohshme terroriste në qendër të Vjenës të hënën në mbrëmje, tha Ministria e Brendshme Austriake.
Ministri i Brendshëm Karl Nehammer i tha televizionit ORF se kishte disa sulmues që hapën zjarr në gjashtë lokacione afër sinagogës qendrore të Vjenës.
Policia bllokoi zonën, zbrazi qendrën e qytetit, krijoi një perimetër sigurie dhe kërkoi për më shumë sulmues që janë ende në arrati. Njëri prej tyre u vra në një përplasje me policinë. Viktima tjetër është një civil. Një oficer policie gjithashtu u plagos rëndë në konfrontim.
Zëdhënësi i Shoqatës Shëndetësore të Vjenës, Christoph Mierau i tha Agjencisë Austriake të Lajmeve (APA) se 15 persona u plagosën, shtatë prej tyre rëndë. Ka frikë se mund të ketë më shumë viktima.
Mediat austriake publikuan pamjet e disa kamerave të sigurisë që tregojnë një ose më shumë sulmues me kominoshe të bardha të armatosur me armë automatike dhe policia u bëri thirrje atyre në Twitter të mos ndajnë pamjet në rrjetet sociale.
Në kohën e sulmit, i cili filloi disa orë para mbylljes së njoftuar për shkak të përhapjes së pandemisë, nuk kishte askënd në sinagogë, tha presidenti i komunitetit hebre atje, Oskar Deutsch.
Ndërkohë sulmi është dënuar me forcë nga Gjermania, Franca dhe Bashkimi Evropian. Presidenti i Këshillit Evropian Charles Michel e quajti atë një akt frikacak. “Ne jemi me Austrinë,” tha ai.
“Ne francezët ndajmë tronditjen dhe pikëllimin e popullit austriak, zemra e të cilit, Vjena, u sulmua sonte. Pasi Franca dhe miqtë tanë u sulmuan. Kjo është Evropa jonë. Ne nuk do të tërhiqemi nga terrori, armiqtë tanë duhet ta dinë me kë kanë të bëjnë”, tha presidenti francez Emmanuel Macron. /tesheshi.com/
