Tjetër shpërthim, të tjerë të vrarë… Turqia vijon të jetë nën goditjen e vazhdueshme të terrorit të të gjitha ngjyrave.
Një ceremoni martesore është kthyer mbrëmë në tragjedi në Gaziantep, një qytet në juglindje të vendit, pranë kufirit me Sirinë.
Shpërthimi ka ndodhur në një rrugicë në lagjen Bejbahçe të zonës administrative Shahinbej, gjatë kohës që njerëzit ishin të mbledhur për një ceremoni martesore.
Tragjik ka qenë bilanci i kësaj masakre, që ka marrë jetën e 30 personave dhe ka lënë të plagosur 94 të tjerë.
Ndërsa mendohet që të ketë qenë një shpërthim kamikaz, ende përgjegjësia për sulmin nuk është marrë nga asnjë grup. Gjithsesi, figura të ndryshme politike, por edhe vendore në atë zonë, sugjerojnë që shpërthimi i përgjakshëm të jetë vepër e ISIS-it.
Presidenti turk, Rexhep Tajjip Erdogan, ka deklaruar kësisoj mes të tjerash në reagimin e tij ndaj aktit terrorist, “Nuk kanë për t’ia dalë ata që nuk mund ta mposhtin Turqinë dhe përpiqen ta provokojnë popullin me ngacmimin e ndjeshmërisë etnike dhe fetare. Nuk ka dallim midis PKK-që që martirizoi 70 punonjës të sigurisë muajin e shkuar, FETÖ-s si një aktor i puçit të 15 korrikut që mori 240 jetë njerëzish, dhe DAESH-it, kryerësit të mundshëm të sulmit terrorist të Gaziantepit.” /tesheshi.com/
