Ndërsa në Perëndim e disa vende të tjera qeveritë po vuajnë rënien e lindshmërisë, duke vënë dhe shpërblime për çdo fëmijë të ardhur në jetë, në Egjipt ndodh e kundërta.
Dhe kjo e ka detyruar presidentin e atyshëm, Abdel Fattah al-Sisi deri dhe të kërcënojë ata që sjellin në jetë më shumë se tre fëmijë, duke marrë dhe rol dhe teologu.
“Ata që do të kenë më shumë se tre fëmijë, do të japin përgjegjësi para Zotit. Norma e lindjeve në Egjipt përbën një kërcënim, të paktën aq sa vetë terrorizmi”, tha Sisi në fjalimin e tij në Konferencën e të Rinjve në Aleksandri.
Sipas tij disa prindër të cilët kanë më shumë se tre fëmijë, nuk do mund t’u sigurojnë ushqim atyre. “Ne shohim disa njerëz që kanë edhe katër fëmijë. Ata nuk kanë as ushqim. Këta njerëz do të pyeten para Zotit sepse kanë bërë padrejtësi ndaj fëmijëve të tyre”, ka thënë Sisi.
Ministri i Shëndetësisë, Ahmed Emad Eldin Rady theksoi se popullata e Egjiptit në vitin 2030 mund të rritet në 120 milionë.
“Nëse shkalla e lindjeve në Egjipt vazhdon me këtë ritëm, numri i popullsisë në vendin tonë në vitin 2030, do të kapë shifrën prej 120 milion”, tha Rady.
Sisi në maj tha se autoritetet egjiptiane janë duke punuar në ligjin për kontrollin e natalitetit, duke vënë në dukje se qytetarët të cilët nuk e respektojnë këtë ligj do të ndëshkohen.
Sipas të dhënave nga prilli 2017, popullsia e Egjiptit është 100 milionë banorë.
Sakaq, diku më tutje, në Turqi, Erdogan u bën thirrje çifteve që të sjellin në jetë sa më shumë fëmijë. /tesheshi.com/
