Autostrada “Rruga e Kombit” është pa pagesë për ata që dërgojnë ndihma, bën me dije Shoqëria Koncesionare e Autostradës Milot – Morinë.
“Ju informojmë se shoqëria koncesionare e autostradës Milot – Morinë (Rruga e Kombit), duke filluar që nga dita e djeshme, datë 26.11.2019 ka lejuar kalimin pa pagesë të të gjithë makinave (individë, shoqata, institucione të Kosovës, Shqipërisë, etj), të cilët janë solidarizuar apo që kanë sjellë ndihma për të prekurit nga tërmeti. Këto grupe personash do të lejohen të kalojnë pa pagesë deri në përfundim të situatës emergjente”, thuhet në njoftim.
Pas tërmeteve të fuqishme që kanë goditur Shqipërinë, sidomos në drejtim të zonave më të prekura janë duke u dërguar ndihma të ndryshme nga Kosova.
Si pasojë e këtyre tërmeteve, numri i viktimave po vazhdon të rritet dhe bëhet e ditur se janë rreth 600 persona të lënduar, si dhe dëme të mëdha materiale. /tesheshi.com/
