Pasi ka siguruar 500 banesa dhuratë nga Turqia, kryeministri Rama synon t’u marrë turqve dhe “fjalën e fundit” në ndërtim.
“Po bëjmë një negociim me një kompani të madhe turke të certefikuar që punon në Amerikë për një supermarrëveshje për shtëpitë antisizmike, ekologjike, kundër zjarrit dhe i thashë të na japin disa oferta për qendra shëndetësore sepse janë me një kosto më të ulët dhe janë super, dhe mund të bëjnë më shumë”, tha Rama, teksa vizitoi QSTU-në, duke inspektuar dëmtimet e atyshme.
Nga ana tjetër, në aksion për mbledhje ndihmash nga jashtë, është përfshirë dhe kryeparlamentari Ruçi. Ai u është drejtuar me një letër kryetarëve të parlamenteve të vendeve të Bashkimit Europian, SHBA, vendeve të rajonit si edhe vendeve të tjera mike e partnere të Shqipërisë duke u thënë me anë të një letre se “megjithë përpjekjet intensive të Qeverisë, institucioneve, ekspertëve, sipërmarrjeve private, shoqërisë civile dhe gjithë qytetarëve shqiptarë, të mbështetur edhe nga organizata, sipërmarrje dhe qeveri të mjaft vendeve mike, të cilët po tregojnë një solidaritet dhe humanizëm të pashoq, burimet dhe kapacitetet tona në përballimin e pasojave të kësaj fatkeqësie natyrore janë të kufizuara dhe të pamjaftueshme. Prandaj ne po mobilizohemi për të fituar sa më shumë mbështetje ndërkombëtare për të rikuperuar sa më shpejt që të jetë e mundur pasojat e rënda të kësaj tragjedie.
Duke Ju shprehur mirënjohjen e thellë timen, të Kuvendit të Shqipërisë dhe të gjithë qytetarëve shqiptarë, do të vlerësoja shumë nëse do të ishte e mundur që ky kontribut të vazhdojë me burime financiare e burime të tjera edhe në fazën e ndërtimit të banesave për të prekurit nga pasojat e tërmetit shkatërrimtar. Ju falenderoj edhe njëherë nga zemra për ndihmën ndaj vendit tim në këtë kohë të vështirë. Këtë mbështetje nuk do ta harrojmë kurrë”, përfundon Ruçi. /tesheshi.com/
