Rreth 20 emigrantë me origjinë afrikane kanë arritur në fshatin Pescara del Tronto, për t’u dalë në ndihmë vendasve dhe për tejkalimin e pasojave urgjente të katastrofës.
Ndërsa shpresat për gjetjen e njerëzve të gjallë nën rrënoja janë zbehur pas një operacioni tre-ditor për shpëtim, vullnetarët janë duke synuar që t’u dalin ndihmë të mbijetuarve që të përballen me fatkeqësinë e tyre.
“Kemi parë njerëz që kanë humbur jetët e tyre dhe ndihemi keq për këtë. Dëshirojmë të tregojmë respekt për ta dhe dinjitetin e tyre”, thotë një prej emigrantëve, Abdullahu 20-vjeçar për Reuters. “Ne duhet të ndihmojmë njerëzit këtu”.
Ndërkohë, një vullnetar nga shërbimi kombëtar Alpine Rescue, tha për agjencinë se “kanë larguar trupat e fundit, për të cilat kemi pasur dijeni”.
“Udhëtimi i afrikanëve në fshat është organizuar nga Human Solidarity Group (GUS), një shoqatë bamirëse italiane”, thotë përfaqësuesja e saj Letizia Dellabarba. Ajo shtoi se iniciativa ka ardhur nga vetë emigrantët, të cilët banojnë në një hotel 50 kilometra larg.
“Ishte ideja e tyre. Ata deshën të bëjnë diçka, ndërsa ne u mundësuam atyre që të realizonin këët dëshirë”, thotë Dellabarba.
Të veshur në uniforma të portokallta, vullnetarët vazhduan të pastrojnë terrenin me qëllim të ngritjes së një tende të improvizuar, në të cilën të mbijetuarit të cilët nuk kanë nga të shkojnë, të mund të kalojnë natën në to. Ata, po ashtu, kanë ndihmuar në lirimin e hapësirës për vendin e uljes së helikopterit.
Bilanci i orëve të fundit tregon për 290 të vdekur në këtë fatkeqësi natyrore, sipas të dhënave nga shërbimi civil i mbrojtës. Ekipet e shpëtimit vazhdojnë të kërkojnë të mbijetuarit në Amatrice, një qytet i vogël dhe i vjetër italian, i cili ka bartur barrën më të rëndë me 221 njerëz të vdekur dhe qindra tjerë të lënduar. /tesheshi.com/
