Tërmeti që goditi Kroacinë qendrore të martën, me një madhësi prej 6.2 të shkallës Rihter, me epiqendrën e tij në Petrinja, është ndër më të fuqishmit dhe më shkatërruesit në këtë pjesë të botës. Zona e Ballkanit si dhe zona më e gjerë gjatë gjithë histories, nuk kanë qenë imune ndaj tërmeteve të mëdha.
Sipas Agjencisë Anatolia, brezi pak më i vjetër kujton tërmetet në fillim të viteve 1960 në Shkup, në fund të viteve 1960 në Banja Luka, si dhe në Malin e Zi në fund të viteve 1970.
Një tërmet është një katastrofë natyrore që, sipas sizmologëve, mund ta presim në çdo kohë dhe në çdo pjesë të planetit Tokë.
Në të njëjtën kohë, sizmologëve nuk u pëlqen të merren me “parashikimin e tërmetit”. Por është e sigurt se pasi shfaqet i pari i fortë nisin e pasojë një seri dridhjesh tokësore. Kjo është pikërisht ajo që po ndodh në zonën e Petrinjas pas tërmetit shkatërrues. Në të njëjtën ditë, shumë prej tyre ishin me intensitet më të ulët, midis tre dhe pesë gradë në shkallën Rihter. Kjo ndodhi e po vijon të ndodhë dhe në Shqipërinë e mesme, në trekëndëshin Tiranë-Durrës-Fushë Krujë, qendra e tërmetit të 26 nëntorit 2019, me pasojë 51 jetëhumbje.
Dy brezat me më shumë tërmete në botë
Brezi sizmik Mesdhetar-Trans-Aziatik është i njohur në botë si një nga zonat ku ndodhin tërmete disi më shpesh sesa në pjesën më të madhe të botës. Fillon në Detin në Mesdhe, përtej maleve të Evropës Jugore, duke u shtrirë Afrikën e Veriut dhe Azinë e Vogël deri në Himalajet. Brezi i dytë është Brezi i Paqësorit dhe besohet se shumica e tërmeteve në botë ndodhin në këto dy breza.
Rajoni i Ballkanit është i vendosur në zonën sizmike Mesdhetare-Trans-Aziatike, ku si pasojë, në shekullin e 20-të u regjistruan disa tërmete shkatërruese.
Tërmetet e forta kanë tronditur Greqinë, por edhe Turqinë disa herë në të kaluarën, të cilat janë gjithashtu pjesë e brezit sizmik Mesdhetar-Trans-Aziatik.
Në zonën që i përkiste ish-Jugosllavisë, tërmeti më i fortë goditi bregdetin malazez në 1979 dhe ishte 7 ballë në shkallën Rihter. Në Shqipëri njihet si tërmeti i Shkodrës me disa jetëhumbje dhe shumë shtëpi të shkatërruara, sidomos në lagjen Bahçkallëk.
Shkupi, sot kryeqyteti i Maqedonisë Veriore, u godit nga një tërmet me madhësi 6.1 në 1963. Më shumë se një mijë njerëz u vranë dhe më shumë se tre mijë u plagosën.
Në 1969, qyteti boshnjak i Banja Lukas u godit nga një tërmet me madhësi 6.4 të shkallës Rihter. Pesëmbëdhjetë njerëz u vranë dhe më shumë se 1,100 u plagosën.
Makarska në bregdetin kroat u trondit nga një tërmet me madhësi 6.2 në 1962, dhe Imotski 20 vjet më parë.
Tërmeti më i fortë në botë u regjistrua në Kili në 1960 dhe ishte 9.5 në shkallën Rihter.
Tërmeti që goditi Japoninë në 2011 ishte me madhësi 8.9 të shkallës Rihter.
Ky nuk ishte më i forti që ka ndodhur në botë, por pasojat ishin ndër më shkatërruese për të gjithë planetin, duke marrë parasysh që pas tërmetit filloi një cunami në të cilin vdiqën dhjetëra mijëra njerëz, dhe një termocentral nuklear u dëmtua, duke shkaktuar gjithashtu një katastrofë të madhe mjedisore. /tesheshi.com/
