Partia e djathtë populiste e Lirisë së Austrisë (FPO) fitoi zgjedhjet parlamentare austriake, por nuk ka gjasa të fitojë një mandat për të formuar një qeveri duke qenë se partitë e tjera refuzojnë të hyjnë në një koalicion me të.
“Kur formohet qeveria duhet të respektohen themelet e demokracisë liberale, përkatësisht: sundimi i ligjit, gjyqësori i pavarur, të drejtat e njeriut dhe pakicave, media e pavarur dhe anëtarësimi në Bashkimin Evropian”, tha presidenti austriak Alexander Van der Bellen.
Presidenti austriak tha se në ditët në vijim “do të jetë e qartë se kush do të jetë me kë dhe çfarë duan për Austrinë”. Van der Bellen, i cili jep mandatin për të formuar qeverinë, nuk e ka fshehur para zgjedhjeve se vështirë se do t’ua japë mandatin për formimin e qeverisë të pavarurve.
“Unë sigurisht nuk do të mbështes partitë që janë thellësisht anti-evropiane dhe që mbështesin Rusinë në luftën kundër Ukrainës në rrugën drejt qeverisë”, tha Van der Bellen disa ditë më parë.
Partia Popullore Austriake (OVP) në vendin e dytë, e cila ka qenë në pushtet së bashku me të Gjelbrit në katër vitet e fundit, pësoi një humbje të madhe votash në krahasim me zgjedhjet e fundit, duke fituar 26.3 për qind, 11.1 për qind më pak se katër vjet më parë.
Me 28.8 për qind të votave, sipas rezultateve jo të plota pas numërimit të 97 për qind të votave, FPO fitoi për herë të parë më shumë vota në zgjedhjet për Këshillin Kombëtar (Nationalrat), siç quhet parlamenti austriak.
Partia Social Demokrate e Austrisë (SPO) ra në vendin e tretë me 21.1 për qind të votave. Në vendin e katërt është partia liberale Neos me 9.2 për qind dhe në vendin e pestë është partia e Gjelbërve me 8.3 për qind.
Partitë e tjera, përfshirë Partinë Komuniste të Austrisë, nuk arritën të kalojnë pragun elektoral prej katër për qind.
FPO fitoi favorin e votuesve duke kritikuar masat gjatë pandemisë së virusit korona, si dhe duke kritikuar ndihmën ushtarake për Ukrainën. /tesheshi.com/
