Gjykata Administrative e Apelit është tërhequr nga vendimi për të gjykuar sot me treshen e gjyqtarëve Arjana Qafa, Enkelejda Metaliaj dhe Alkelina Gazidede dy çështjet gjyqësore që lidhen me ndërtimin e pallatit 17 katesh te Diga e Liqenit.
Protesta qytetare e thirrur nga Bashkia e Tiranës ka bërë që treshja e gjyqtarëve të tërhiqej duke e shtyrë për të premten, datë 13 maj, shqyrtimin e dy kërkesave, njëra e paraqitur nga IKMT për shfuqizimin e lejes së ndërtimit për pallatin 17 katesh dhe tjetra e firmës ndërtuese “Gener 2” kundër IKMT që kërkon lejimin e punimeve për këtë pallat.
Lajmin e ka dhënë kryetari i Bashkisë së Tiranës, Erion Veliaj para protestuesve të shumtë, të cilët për afro 3 orë i kërkuan Gjykatës drejtësi.
“Sapo na erdhi lajmi i mirë, është shtyrë edhe gjyqi tjetër. Kjo ishte fitorja jonë, kjo ishte fitorja juaj, kjo ishte fitorja e qytetarëve që nuk mund të kenë paratë, muskujt dhe mbiemrat e këtyre por që kanë të drejtën me vetë. Shtyrja e gjyqeve sot provoi që ne që dje kishim të drejtë, që anulimi i kërkesës sonë dje ishte i gabuar. Pra kur gjykata do gjykata mundet dhe kur gjykatës i hapen sytë nga presioni i popullit, gjykatat e njohin si jepet drejtësi”, – tha Veliaj. /tesheshi.com/
