LSI ka reaguar menjëherë pasi Partia Socialiste është tërhequr nga dy nismat e depozituara në Kuvend, ligjin për mbetjet dhe atë për dekoratat.
Kreu i grupit parlamentar të LSI-së, Petrit Vasili ka kërkuar një referendum popullor pikërisht për ligjin e mbetjeve, për të cilin më herët Taulant Balla tha se do kërkonin mendimin e popullit.
“Referendum popullor për plehrat. Ligji për importin e plehrave u fut në mënyrë tinëzare në parlament një vit më parë, pasi kryeministri demagog e anulloi importin e plehrave me vendimin e tij të parë si kryeministër në shtator 2013.
Populli shqiptar është shumë i shqetësuar për pasojat e rënda mbi shëndetin e tij dhe të gjeneratave që do të vijnë.
Populli është shumë i shqetësuar që Shqipëria do të shndërrohet në gropën e plehrave të të gjithë Europës, pasi me këtë ligj të gjithë llojet e sojet e plehrave do të derdhen në Shqipëri.
Zgjidhja është vetëm një referendum popullor për t’i thënë po ose jo vërshimit të plehrave në Shqipëri.
Këtë vendim mund ta marrë vetëm populli pasi pasojat e tmerrshme mbi shëndetin dhe jetën do te bien mbi të dhe do ti vuajë vetëm ai”, tha Vasili. /tesheshi.com/
