Grupi i fundit i civilëve dhe i kryengritësve, diku te katër mijë, e la dje pjesën lindore të Halepit, duke i dhënë fund një evakuimi të ndërmjetësuar nga Rusia dhe Turqia. Evakuimi i djeshëm e çoi numrin e atyre që e kanë lënë këtë territor në javën e fundit në mbi 40.000.
Me përfundimin e evakuimit, ushtria siriane shpalli rimarrjen tërësisht të Halepit, e parë si fitorja më e madhe e regjimit të Beshar Esadit në konfliktin thuajse gjashtëvjeçar.
Një deklaratë e ushtrisë, e lexuar në televizionin shtetëror nga një gjeneral, thoshte se fitorja në Halep ishte një pikë kthese në luftën ndaj terrorizmit.
Deklarata u bë menjëherë pasi televizioni shtetëror njoftoi për largimin nga pjesa lindore e Halepit të autokolonës së fundit me të evakuuar.
Të larguarit nga Halepi mund të përballen sërish me të njëjtën situatë aty ku janë strehuar, në Idlib. Provinca pritet të jetë objektivi i ardhshëm i Esadit, ndërsa është tanë në duart e kryengritësve.
“Shumë nga ata kanë shkuar në Idlib, që në teori mund të jetë Halepi i ardhshëm,” u shpreh në Gjenevë i dërguari i posaçëm i OKB-së për Sirinë, Staffan de Mistura. Ai e quajti jetike dhënien fund të luftimeve në të gjithë Sirinë nëse kërkohet shmangia e tragjedisë së Halepit.
Marrja e lindjes së Halepit nga forcat qeveritare është humbja më e madhe për kryengritësit që prej nisjes së luftimeve në mars të 2011-s. Regjimi ka nën kontroll tani pesë qytetet kryesore të Sirisë, Damaskun, Halepin, Latakian, Homsin dhe Hamanë. /tesheshi.com/
