Mediat tabloide dhe nacionaliste serbe nuk kanë lënë rastin për të “qarë” pas pranimit të Kosovës në UEFA.
Ndërsa qarqet e moderuara e kanë trajtuar si lajm, mediat nacionaliste tabloide kanë shpërthyer duke thirrur skandal.
Gazeta tabloid Kurir shkruan: “Skandal në Budapest. UEFA shkel statusin dhe e pranon Kosovën kur ajo është pjesë e Serbisë”.
Madje kjo gazetë shkon edhe më tej duke deklaruar se ka pasur presion politik nga kancelaritë e Bashkimit Europian.
“Nuk është sekret që ka pasur presion të madh politik mbi shumë nga delegatët për të vepruar në përputhje me politikat e qeverisë së tyre dhe qeverive të 38 anëtarëve të UEFA-s nga 54 gjithsej, vende të cilat e kanë njohur pavarësinë e shtetit të vetëshpallur të Kosovës”, thekson Kurir.
Ndërkaq, televizioni B92, një media serioze bën një kronikë të thjeshtë me titull “Kosova, anëtar i ri i UEFA-s” dhe e trajton çështjen vetëm nga ana sportive. /tesheshi.com/
