Ministria e Jashtme e Maqedonisë së Veriut shprehu “shqetësimin e saj serioz” mbi rezultatet e Censusit të kryer në Shqipëri, njëherësh duke reaguar ashpër ndaj përdorimit të termit “maqedonas të veriut” për të përshkruar pakicën maqedonase që jeton në Shqipëri.
Sipas rezultateve nga Shërbimi Statistikor i Shqipërisë, popullsia e vendit shkon në 2.4 milionë banorë, e reduktuar me 410 mijë në krahasim me Censusin e mëparshëm të kryer në vend në vitin 2011.
Numri i “maqedonasve të veriut” në Shqipëri është 2281, krahasuar me 5512 në regjistrimin e vitit 2011, ndërsa për herë të parë 7957 persona janë regjistruar tani si “bullgarë”, edhe pse në 11 regjistrimet e mëparshme në Shqipëri nuk është deklaruar asnjë person i vetëm bullgar.
Me fjalë të tjera, “maqedonasit e veriut” janë vetëm 0.1% e popullsisë së Shqipërisë.
Autoritetet shqiptare njohën një “pakicë bullgare” në Shqipëri vetëm në vitin 2017. Sofja zyrtare pretendon se në regjistrimet e mëparshme në Shqipëri, popullsia bullgare që jetonte në vend është penguar të llogaritet si e tillë.
“Parregullsitë teknike, si para ashtu edhe gjatë regjistrimit të popullsisë në Shqipëri, të cilat vazhdimisht janë vënë në dukje nga organizatat maqedonase në Shqipëri, kanë rezultuar në shpalljen e të dhënave paraprake të cilat, për fat të keq, nuk pasqyrojnë në mënyrë adekuate numrin aktual të maqedonasve etnikë në vend”, thuhet nga Ministria e Punëve të Jashtme të Maqedonisë së Veriut, e cila njofton gjithashtu se po e tërheq ambasadorin e saj në Tiranë për konsultime në Shkup.
Gjithashtu, gjatë shpalljes së rezultateve të regjistrimit në Shqipëri, përfaqësuesi i ambasadës së Maqedonisë së Veriut u largua nga prezantimi në shenjë proteste, sepse flitej për “maqedonas të veriut” dhe jo për “maqedonas”. Përfaqësuesit e kësaj të fundit në Shqipëri bënë të ditur se nuk i njohin rezultatet e këtij regjistrimi në Shqipëri, të zhvilluar në shtator dhe tetor 2023 dhe po kërkojnë një të ri. Të njëjtët përfaqësues akuzojnë Bullgarinë për “politikë asimilimi të “maqedonasve” që jetojnë në Shqipëri, duke lëshuar pasaporta bullgare dhe duke ushtruar presion që ata të regjistrohen si “bullgarë”, ndërsa theksojnë se autoritetet shqiptare nuk kanë bërë asgjë për të parandaluar veprime të tilla.
Bullgaria i hedh poshtë kategorikisht këto akuza, të cilat, megjithatë, janë përqafuar nga Shkupi zyrtar.
Pak orë pas reagimit të Ministrisë së Punëve të Jashtme të Maqedonisë së Veriut, Ministri i Punëve të Jashtme të vendit, Timco Muchunski, deklaroi se pas ndërhyrjes së tij ndaj homologut të tij shqiptar, Igli Hasani, Shërbimi Statistikor i Shqipërisë “korrigjoi” termi “maqedonasit e veriut” me termin “maqedonas”. /tesheshi.com/
