Ngjan si një koinçidencë disaplanëshe raporti Rama – Meta, me atë Erdogan – Gylen, përjashtuar fillin fetar, që veç atij politik, edhe ai deri diku i bashkoi e më pas i ndau këta të dy të fundit.
Në këtë pikë, Rama e Meta nuk se kanë ndonjë mospajtim, gjersa janë aq laikë, sa, si bektashizmi i njërit ashtu dhe katolicizimi i tjetrit, nuk janë vetëdije aq të forta identitare sa të bëhen shkak për thellimin e ndarjes mes vedi. Ndërsa në të tjera drejtime, thuajse ka një fotokopje të vendosur cinikisht nga rrethanat.
Erdogan dhe Gylen ishin aleatë për shumë vite, deri sa erdhi ndarja dhe përplasja e madhe, po ashtu siç me Ramën dhe Metën. Tek të parët ekzistonte një arsye sa politike aq dhe shtetërore, po ashtu siç tek të dytët. Erdogan akuzon Gylenin – veç tentativës për grusht shteti 14 korrikun e 2016-ës – edhe për puçe brenda ngrehinës shtetërore; e nga ana tjetër edhe Rama akuzon Metën – jo drejtpëdrejt – se partia e tij, LSI i bën “puçe” shtetit me prirjen për “tepsi pushteti”.
Nga ana tjetër, në sallonet e politikës Meta konsiderohet si një mburrojë e elementit “Gylen” në Shqipëri, edhe për faktin se fëmijët e tij janë nxënës të Gylenit – pra në kolegjet turke – ndërsa Rama, si mik për kokë i Erdoganit, është ngarkuar me mision nga ky i fundit për ta pastruar Shqipërinë nga gylenistët.
Dhe vijmë tani tek realiteti i ri politik, ku Rama pritet të ndërmarrë një fshesë në administratë, siç ka paralajmëruar, për ta pastruar atë nga tepsixhinjtë. Ky term i ri, “tepsixhinj”, të çon direkt tek elementi LSI i cili për 8 vjet me radhë ka hedhur rrënjë në shtet. Rama e artikulon ndryshe, por nuk është vështirë të kuptohet se më së pari fjala është për njerëzit e Metës kudo, në çdo nivel administrate, nga një aleancë e gjatë me të mëdhenjtë e pushtetit. Dhe ngjan kjo tëpke si operacioni erdoganist i viteve të fundit – intensifikuar akoma më shumë pas korrikut të kaluar – në përndjekje të çdo elementi gylenist në çdo nivel, shteti e pushteti.
Madje Erdogan kërkon dhe burg për Gylenin, por kjo gjë ende nuk mund të thuhet kaq qartazi për Ramën karshi Metës. Ama një sinjal është dhënë, kur drejtorë të LSI-së janë çuar pas hekurave gjatë viteve të fundit me akuza për korrupsion, nën një aleancë qeverisëse që mbahej me paterica. Por dhe reforma në drejtësi, përbën një lexim kërcënues se kjo mund të ndodhë.
Megjithatë, një gjë është e qartë pas ndarjes së madhe ndodhur mes dy aleatëve e që i ka çuar në pozicione tejet armiqësore: që ai në pushtet, Rama, e ka të pashmangshëm një pozicion erdoganist përballë “shtetit parelel të Metës brenda shtetit”, që e vendos këtë të fundit, “padashje” në pozita gyleniste. /tesheshi.com/
