Deputeti demokrat Tomor Alizoti pati një shfrim deri diku të përligjur ndaj Ramës, pas frazës së këtij të fundit në parlament se PD ngjan me një mbetje të PP-së së dikurshme. Ai është ndoshta i vetmi i djathtë prej një trashëgimie fisnike familjare dhe, në këtë pozicion, është ndjerë i fyer. Por arriti të ndajë veten nga PD në reagimin ndaj Ramës, duke iu qasur këtij të fundit nga pozita personale dhe jo partiake.
Tha se kur ai qe në Spaç, më saktë të parët e tij, ai(Rama) bridhte Bllokut.
Dhe këtu nisi teprimi, ose aspekti josimpatik i reagimit, pasi huazoi një fjalor me thelb komunist, autor i së cilës ka qenë çerekshekulli komunist. Quhet Sali Berisha. Dhe është një fjalor që ai, si shumëçka, ia ka ngjizur PD-së. Alizoti nuk duhet ta bënte këtë gabim, pasi kompromenton rëndë djathtizimin e tij, ose anti-komunizmin e tij. Kjo sepse portetizimi i Ramës në këtë mënyrë, i klisheizuar në mënyrën më komuniste të mundshme, është një mbetje edhe komuniste edhe berishiste.
Në thelb është një e pavërtetë e madhe. Rama, gjykuar nga pozicioni ku e pa patur shtëpinë në komunizëm, si dhe llojin e pallatit ku banonte, ishte shumë larg Bllokut si status social apo politik. Siç dihej, banimi ishte ndër treguesit e raportit me pushtetin. Blloku ishte qendra, më pas vinin nivelet e tjera, sipas pozicionit në parti. Aty ku është rritur Rama, “te Unaza”, pak metra larg “21-shit”, kati i katërt, pallat tipik komunist, s’kish asgjë prej Blloku.
Tjetra: Kristaq Rama nis e futet në gojën e Berishës kur i biri nis e i bëhet rival politik dhe kur kishte ikur nga kjo botë. Më parë, as që e përmendte kush, aq më pak si njeri me dritë-hije diktatoriale. Sigurisht, nuk ka qenë kurrë anëtar i Byrosë Politike, siç, ndoshta nxitueshëm, e cilësoi Alizoti. Por ndoshta e ngatërroi me Spiro Kolekën. Edhe ky i fundit, është një armik i gjetur në brezat e farefisnisë së Ramës nga kundërshtari politik, tipikisht si në komunizëm, duke i gërmuar në biografi.
Dhe ç’është më kryesorja, nuk ka patur të dytë si Rama në anti-komunizmin e tij në ‘90-ën, në daç si aksione politike, në daç si ligjërim, në daç si stil jete.
Sot ai është në pozita qeverisëse dhe si i tillë ka plot mëkate. Është e mundshme t’i thuash çdo gjë, të akuzosh për shumëçka, por jo me gjuhën e rëndomtë, klisheike dhe aspak etike të Berishës.
Alizotit, edhe si ri e mendjehapur, edhe me një krenari të fisme gjaku që Berisha s’e ka, i takon të reformojë shumëçka në ligjërimin katastrofik të partisë së tij, realisht me mbetje ulëritëse komuniste, prej një njeriu të lindur për të qenë komunist.
Të akuzosh Ramën për trashëgimtar komunizmi, është si të akuzosh Shkodrën apo katolikët e Shkodrës si sjellës të komunizmit, meqë iniciatori real i themelimit të PKSH, Zef Mala, ishte shkodran katolik. /tesheshi.com/
