Kombëtarja shqiptare e futbollit ka vijuar teposhtën e saj të pafrenueshme dot, duke barazuar dhe me Islandën 1-1, në kuadër të Ligës së Kombeve, pas humbjes me Izraelin 1-2. Kjo bëri që për herë të parë të ketë një reagim nga tifozeria, në Air Albania, e cila e zhgënjyer rëndë u ka treguar lojtarëve dhe trajnerit Reja, me gishtin kthyer poshtë simbolikisht, se duhet të largohen.
Kjo ka bërë madje që porter Berisha i pari e lojtarët e tjerë pas tij, të shkojnë te tifozeria e irrituar për t’u sqaruar me ta.
Shqipëria mund ta fitonte takimin, pasi kryesonte 1-0 deri në fund të ndeshjes, pak para se të binte bilbili, me një gol të Lenjanit. Por në fund, në shtesë, islandezën shënuan golin e barazimit, duke u dhënë kështu një goditje të rëndë kuqezinjve në fushë dhe atyre që ishin në shkallët e stadiumit.
Trajneri Reja, në fund tha se ai ishte përpjekur trë bënte më të mirën, por se jo gjithçka ishte faji i tij.
“Unë nuk kam asnjë keqardhje, pasi kam bërë një punë të mirë dhe jam munduar të ndihmoj skuadrën. Nuk jam unë problemi i Shqipërisë, pasi po të ishte kështu, presidenti do të ma kishte thënë. Nëse ma thotë diçka të tillë, nuk ka asnjë problem për mua. Unë jam munduar të përmirësoj qoftë individët, qoftë skuadrën.
Ne sot ishim në epërsi numerike dhe duhej të mbyllnim ndeshjen, por nëse kjo nuk ndodh, atëherë nuk është faji im. Ata kanë bërë 5 gjuajtje dhe katër prej tyre në kuadrat. Ne kemi bërë 21 gjuajtje dhe vetëm 4 në kuadrat, ndaj nëse nuk janë të zotët ta dërgojnë topin në rrjetë, nuk kam çfarë të bëj. Duhet të përmirësohemi në këtë aspekt”, tha italiani i pankinës shqiptare, pa pranuar që të dorëhiqet. /tesheshi.com/
