Konflikti sirian vazhdon të marrë jetë njerëzish të pafajshëm, me bilancin që rëndohet çdo ditë e më shumë. Raportimet e fundit nga terreni flasin për më shumë se 500 civilë të vrarë në qytetet siriane përgjatë një jave.
Një rrjet aktivistësh në Siri, Komitetet Lokale të Koordinimit, ka bërë të njohur të shtunën shifrat mbi viktimat, duke deklaruar 508 civilë të vrarë nga data 13 gjer në 19 gusht. 96 prej të vrarëve janë fëmijë, e 73 janë gra.
Të vrarët janë më së shumti për shkak të bombardimeve të regjimit sirian dhe të Rusisë. Më e pakta 205 prej viktimave i përkasin Halepit, të vrarë gjatë luftimeve mes kryengritësve dhe forcave qeveritare.
Por viktima janë shënuar gjithashtu në Idlib, Damask dhe në Hama. Një aktivist i Komiteteve Lokale të Koordinimit i tha Al Jazeera-s se viktimat në civilë janë shtuar ndërsa regjimi sirian ka humbur terren në frontin e luftës.
“Çarja e rrethimit të qytetit dhe marrja e fortesave ushtarake nga rebelët i ka zhgënjyer Rusinë dhe Sirinë. Ato e kanë shtuar shumë përdorimin e armëve të ndaluara.”
Komitetet Lokale të Koordinimit raportuan vrasjen e 93 civilëve në Idlib, 52 të tjerëve në Homs, 51 në Damask, 38 në Dejr ez-Zur, e të 34 civilëve në Hama.
Shumica prej tyre e kanë humbur jetën prej sulmeve ajrore, por dhe prej luftimeve në terren.
280.000 sirianë deklarohet të jenë vrarë gjatë pesë viteve të konfliktit të përgjakshëm, me miliona të tjerë të zhvendosur brenda e jashtë vendit. /tesheshi.com/
