Konflikti sirian vijon të marrë pandërprerë jetë njerëzish. Al Jazeera, e cila u referohet grupeve aktiviste lokale, flet për më shumë se 180 civilë të vrarë në vetëm dy ditë në tërë Sirinë.
Një rrjet aktivistësh, Komitetet Lokale të Koordinimit, ka deklaruar të dielën se më shumë se 180 civilë janë vrarë në Siri që nga e premtja, duke përfshirë 22 fëmijë dhe 23 gra.
Më së paku 90 njerëz u vranë të premten, e 83 civilë të tjerë të vrarë pati nga nata e së shtunës, me shumicën e të vrarëve në Halep, aty ku dhe luftimet janë më të ashpra.
Observatori Sirian për të Drejtat e Njeriut raportoi po ashtu dje mbi shifrat e të vrarëve, duke vënë në pah se më e pakta 327 civilë, mes të cilëve 76 fëmijë e 41 gra, kanë humbur jetën në Halep gjatë 15 ditëve të fundit.
Një gazetar lokal në Halep do t’i deklaronte Al Jazeera-s se bombardimet janë intensifikuar.
“Regjimi përdori dje bomba thërrmuese, që po përdoren gjerësisht së fundi, për të sulmuar një stacion autobusi në lagjen el-Firdus, ku më shumë se 50 civilë po përpiqeshin të largoheshin nga qyteti. Shumica e tyre u vranë.” /tesheshi.com/
