Ministria e Rendit ka dalë me një deklaratë ku u bën thirrje shtetasve shqiptare që mos gënjehen nga ideja së mund të fitojnë azil në vendet e BE-së. Kjo, pas lajmeve se disa qytete të vendit, por sidomos në Kukës, shumë individë po aplikojnë për pasaporta biometrike, si një parapërgatitje për t`u larguar nga vendi:
“Duke parë fluksin e pazakontë të qytetarëve që aplikojnë për pasaporta biometrike përgjatë 48 orëve të fundit, si dhe duke konsideruar maksimalisht të dhënat paraprake mbi mundësitë e një skeme mashtrimi për udhëtimin në zonën Shengen, me qëllim final kërkesën për azil në vendet e BE-së, Ministria e Punëve të Brendshme u bën thirrje qytetarëve të distancohen nga çdo iniciativë ose ofertë me qëllim mashtrimi për azil të kundraligjshëm në vendet e Bashkimit Europian.”
Kjo deklaratë vjen një një kohë kur është shtuar prirja për t`u larguar jashtë vendit, për shkak të një situatë jo të mirë ekonomike dhe sociale që përjeton Shqipëria. Edhe pse mashtrim, kjo u testua në rastin e një thashathemnaje të përhapur aty nga nëntori në Vlorë për disa autobusë që do niseshin drejt Gjermanisë, ku shumë individë e familje, u dyndën si dikur në vitet e para `90 për t`u larguar nga vendi.
Ndërkohë, pak javë më parë ishte Kosova ajo që u përfshi nga një valë ikjeje drejt Gjermanisë. Që atëherë, autoritetet europiane e kanë vënë theksin tek respektimi i rregullave të Shengenit, si dhe kanë paralajmëruar se askush nuk do mund të përfitojë azil.
Dhe për t`i dalë para së keqes, janë autoritetet shqiptare tashmë që po përpiqen të bindin shtetasit e ndryshëm që mos ndërmarrin iniciativa emigrimi, suke shkelur rregullat e levizjës së lirë. Ja ç`thuhet më tej në deklaratë:
Ministria e Punëve të Brendshme bën me dije se është absolutisht e pamundur, fitimi i azilit në çdo vend të BE-së.
“Policia e Shtetit ka shtuar kontrollet dhe rritur masat në Pikat e Kalimit kufitar për evidentimin e plotë të dokumentacionit dhe përmbushjen e të gjitha kritereve për udhëtimin e qytetarëve shqiptarë në zonën Shengen.
MPB kujton edhe njëherë qytetarët që kërkojë të udhëtojnë në zonën Shengen, mbi detyrimin që përveç paraqitjes së dokumentacionit të udhëtimit, të shpjegojnë edhe itenerarin, qëllimin e udhëtimit, si dhe garancitë financiare të kërkuara.
Policia e Shtetit kanë nisur hetimet mbi raste të mundshme trafikimi të qënieve njerëzore, me qëllimin evidentimin e çdo rrjeti apo skeme mashtruese për përfitimin e azilit.
Nga ana tjetër, në bashkëpunim edhe me partnerët ndërkombëtare janë marrë të gjitha masat për mos lejuar, kthyer dhe ndjekur penalisht në zbatim të legjislacionit në fuqi, çdo shtetas shqiptar që abuzon me të drejtën për të udhëtuar në zonën Shengen, duke kërkuar në mënyrë të padrejtë azil politik.”
/tesheshi.com/
