Përpjekjet e një grupi ushtarak për ta rrëzuar qeverinë turke dhe tentativa për një grusht shteti, edhe pse në fund kanë rezultuan të pasuksesshme, i kanë vënë në alarm autoritetet e Maqedonisë. Kështu, nga Komiteti për Siguri Kombëtare në Maqedoni kanë njoftuar se ka nisur rritja e sigurisë dhe e kontrolleve brenda vendit, si dhe në kufijtë me shtetet fqinje.
Për momentin nuk është e qartë nëse ky numër i madh i forcave të sigurisë nëpër të gjitha pikat kufitare të Maqedonisë vjen si pasojë e drojes nga emigrimi i refugjatëve pas trazirave të fundit, që thuhet se me të madhe po ikin nga Turqia në drejtim të vendeve ballkanike. Në kumtesën e mëposhtme të Komitetit për Siguri Kombëtare nuk përmenden arsyet konkrete të shtimit të sigurisë në vend.
“Udhëheqësi i Komitetit për koordinim dhe udhëheqje në kohë krizash ka mbajtur një seancë informative me Këshillin e Sigurimit Shtetëror të Maqedonisë dhe ka informuar për gjendjen e refugjatëve në kufijtë e vendit. U vlerësua se për periudhën e ardhshme do të duhet të rritet siguria në vend dhe jashtë, respektivisht në kufijtë tanë. Janë shtuar forcat e sigurisë, dhe ushtria ka mbërritur në vende të cilat janë vlerësuar si problematike,” thuhet në komunikatën e lëshuar nga Këshilli i Sigurimit shtetëror të Maqedonisë. /tesheshi.com/
