Greqia thotë se është e gatshme të nisë një dialog me Turqinë pas javësh tensionesh mbi rezervat e gazit natyror në Mesdheun dhe kufijtë detarë, por vetëm kur Ankaraja të ndalojë së provokuari.
Anëtarët e NATO-s dhe vendet fqinje kanë mprehur retorikën e tyre ndaj njëri-tjetrit ndërsa të dy pretendojnë të drejtën për të kërkuar gaz dhje naftë në të njëjtën pjesë të Mesdheut lindor, sipas dpa.
Turqia ka dërguar anije kërkimore në ujërat e diskutueshme dhe aleatët evropianë po dërgojnë anije në rajon në mbështetje të Greqisë. Si Ankaraja ashtu edhe Athina, janë duke kryer manovra me fregata dhe aeroplanë luftarakë.
Kryeministri grek Kyriakos Mitsotakis tha se kërkesat e tij mund të përmblidhen lehtësisht. “Fundi i provokimeve, fillimi i bisedimeve”.
Gjermania u përpoq të negocionte një armëpushim të enjten mbrëma në një video konferencë midis kancelares Angela Merkel dhe Presidentit Erdogan.
Sekretari i Përgjithshëm i NATO-s Jens Stoltenberg konfirmoi të premten se bisedimet teknike tashmë janë duke u zhvilluar midis Greqisë dhe Turqisë për parandalimin e përshkallëzimit të tensioneve ushtarake.
“Këto janë bisedime teknike, jo negociata mbi mosmarrëveshjet e mëdha midis Greqisë dhe Turqisë,” tha Stoltenberg, duke shtuar se asnjë marrëveshje nuk ishte arritur për një mekanizëm të mundshëm për të ulur shanset e “incidenteve dhe aksidenteve” në Mesdheun lindor.
Ankaraja mbështeti iniciativën e Stoltenberg
Athina më parë ka mohuar diskutime të tilla, me burime të Ministrisë së Jashtme, duke thënë se Greqia dëshiron që Turqia të tërheqë anijet e saj nga ajo që thotë se është vetëm zona ekonomike greke.
Ankaraja mbështeti iniciativën e Stoltenbergut dhe i bëri thirrje Athinës që të ndjekë shembullin e tyre.
Ministri i Jashtëm turk Mevlut Çavusoglu tha të premten se “Greqia ka treguar edhe një herë se nuk është në favor të dialogut” dhe akuzoi Athinën për “gënjeshtra” për rolin ndërmjetësues të NATO-s.
Ai tha se Stoltenberg u konsultua me të dy shtetet që ranë dakord për bisedime teknike.
Mitsotakis, ndërkohë, tha se ai nuk ishte i shqetësuar për deklaratat e hershme të Erdoganit por ishte i interesuar vetëm nëse Turqia ishte e gatshme të diskutonte.
Turqia dërgoi anijen e saj kërkimore “Oruc Reis”, të shoqëruar nga anije luftarake, në ujërat midis Qipros dhe ishujve grekë Kastelloriza dhe Kretë në gusht, gjë të cilën Greqia e kundërshtoi.
Presidenti i Këshillit Evropian Charles Michel tha se ai kishte sugjeruar që Turqia dhe partnerët e tjerë të zhvillonin një konferencë shumëpalëshe për të ulur tensionet.
Mishel do të udhëtojë në Qipro, Greqi dhe Maltë përpara samitit evropian të planifikuar për 24-25 Shtator. Tema qendrore pritet të jetë situata në Mesdheun lindor.
“Ne nuk pranojmë sjellje të njëanshme që nuk është në përputhje me ligjin ndërkombëtar,” tha Michel në një intervistë.
Presidenti turk më parë deklaroi se Turqia nuk pretendon territorin e askujt, sovranitetin dhe interesin, por ai shtoi se ai nuk do të lejonte uzurpimin e asaj që i përket vendit të tij. /tesheshi.com/
