Administrata e Presidentit Trump po intensifikon marrëdhëniet e saj të diskutueshme ushtarake me Arabinë Saudite, duke u përgatitur për të dërguar qindra ushtarë në vend mes tensioneve në rritje me Iranin.
Sipas dy zyrtarëve të mbrojtjes amerikane, pritet që 500 ushtarë të shkojnë në një bazë ajrore të vendosur në shkretëtirën lindore të kryeqytetit saudit Riad, njofton CNN.
Një numër i vogël i ushtarëve dhe personelit mbështetës janë në vend, dhe janë bërë përgatitjet fillestare për baterinë mbrojtëse Patriot, si dhe për përmirësimin e pistës dhe aeroportit, thanë zyrtarët.
Shtetet e Bashkuara donin të vendosnin trupa ushtarake atje për disa kohë, sepse sipas vlerësimeve të sigurisë, raketat iraniane do të kishin vështirësi të goditnin objektivat në një zonë kaq të largët.
Vendimi vjen ndërsa marrëdhëniet midis Shteteve të Bashkuara dhe Arabisë Saudite mbeten jashtëzakonisht të ndjeshme për shkak të vrasjes së gazetarit Jamal Khashoggy.
Jamal Khashoggi, një shkrimtar dhe gazetar saudit i cili jetonte në mërgim në Shtetet e Bashkuara, u ekzekutua më 2 tetor 2018, në konsullatën saudite në Stamboll.
Pas një serie informacioni kontradiktor rreth krimit, Arabia Saudite pranoi se Khashoggi u vra në ndërtesën e konsullatës, por krimi sipas saj u krye nga “agjentë të penduar”.
Administrata Trump, megjithatë, tha se ishte e angazhuar për të ndihmuar në mbrojtjen e Arabisë Saudite nga agresioni i Iranit.
Muajin e kaluar, administrata amerikane njoftoi se do të dërgonte një kontigjent prej 1,000 trupash në Lindjen e Mesme, por pa specifikuar se në cilat vende do të shkonin.
Forcat që shkojnë në Arabinë Saudite janë pjesë e kësaj pakete. /tesheshi.com/
