Nga Blendi Gashi
Mali i Zi është inatosur me Kosovën për aktin e bërë nga deputetët e Lëvizjes Vetëvendosje në kufi, të cilët, ditë më parë vendosën tabelën me mbishkrimin “Mirësevini në Republikën e Kosovës” dhe vendosën flamurin kombëtar, në atë që ata mendojnë se është vija kufitare mes dy shteteve, e jo aty ku e përcakton Demarkacioni i firmosur në Bruksel.
Ky veprim i VV-së bëri që shteti malazez t’i dërgoi një notë proteste me tone të ashpra shtetit kosovar.
Në notën e protestës së dërguar nga Ministria e Punëve të Jashtme dhe ajo e Integrimeve e Malit të Zi, thuhet se me këtë akt po bëhen përpjekje të shkatërrohen marrëdhëniet e mira që janë ndërmjet Malit të Zi dhe Kosovës.
“Presim nga ana e Kosovës të ndërmarrë masa identifikimi të aktorëve dhe të pengojë aktivitete të ngjashme në të ardhmen, sepse me këto akte dëshirohet të kontestohet Marrëveshja e harmonizuar dhe e nënshkruar në Vjenë në vitin 2015 për kufirin ndërshtetëror”, thuhet në notën e protestës.
Ndërkohë, në sallonet e politikës kosovare, ia behën shumë reagime, duke nisur nga kryeminisri, deputetë të ndryshëm, si dhe nga analistë në vend.
Kryeministri Isa Mustafa, përmes një shkrimi në Facebook iu kundërpërgjigj VV-së duke thënë se marrëveshja e Demarkacionit është në rregull dhe se duhet të kryhet si obligim, ngaqë vendi rrezikon liberalizimin e vizave.
Ai ka thënë se askush ende nuk është lajmëruar dhe të tregojë se ka tokë të humbur.
“Është jo racionale dhe e dëmshme që kufiri të caktohet me kutin e patriotëve dhe tradhtarëve. Me këtë kut ne mund të flasim për kufirin këndej, jo andej në Mal të Zi. Sepse atje në dhjetëditëshin e parë të korrikut do të jetë kufi me një vend të NATO-s”, ka thënë Mustafa.
Përveç kryeminstrit, shqetësimin e tij e ka ngritur edhe deputeti i LDK-së, Armend Zemaj, i cili vendosjen e flamurit dhe tabelës nga ana e deputetëve të VV-së e ka quajtur veprim politik, pasojat e së cilit, sipas tij, nuk mund t’i parashikojë askush.
“Aktet populiste nuk i kontribuojnë ndoshta edhe zgjidhjes së një situate të caktuar. Mbi të gjitha është një veprim politik, besoj i pa menduar mirë edhe pasojat e të cilit askush nuk mundet t’i parashikojë”, tha Zemaj për televizionin publik.
VV paralajmëron qeverinë “Mustafa”
Megjithatë, reagimet e bëra nga kryeministri dhe jo vetëm, aspak nuk i bëjnë përshtypje Lëvizjes Vetëvendosje.
Kjo parti paralajmëron ekzekutivin kosovar se nëse çështja e Demarkacionit nuk rikthehet në rinegocim atëherë situata do të tensionohet.
Frashër Krasniqi, zëdhënës i Vetëvendosje-s, thotë se organet malazeze janë futur brenda territorit të Republikës së Kosovës dhe kanë hequr tabelat e vendosura nga deputetët e Republikës së Kosovës.
Sipas tij, ky është veprim i papranueshëm dhe qeveria e Kosovës do të duhej të reagonte menjëherë, derisa shton se po të ishte në pushtet VV-ja Mali i Zi nuk do të mund ta hiqte një tabelë të tillë.
“Raportet ndërmjet Kosovës dhe Malit të Zi nuk mund të jenë të shtensionuara nëse demarkimi i kufinjve bëhet në kurriz të territorit të Republikës së Kosovës. Askund në botë nuk ka pasur raporte të mira në mes të dy shtetëve nëse njëri nga ta ka synuar të marrë pjesë të territorit të shtetit tjetër. Nëse Qeveria e Republikës së Kosovës dhe ajo e Malit të Zi nuk duan tensionim të situatës atëherë duhet të rinegociojnë çështjen e demarkacionit dhe ta zgjidhin atë në mënyrë të drejtë pa pasur nevojë që Kosova të humbë pjesë të territorit të saj”, ka thënë Krasniqi për tesheshi.com, por nuk ka treguar nëse deputetët e VV-së sërish në kufi për të rivendosur tabelën dhe flamurin edhe pse është paralajmëruar se do të ndodhë një gjë e tillë.
Ndryshe, ambasadori i SHBA-së në Kosovë Greig Delawie është shprehur i zhgënjyer me sjelljet ndaj Malit të Zi, ndonëse diplomati amerikan nuk përmendi aksionin e disa deputetëve të VV-së, tha se Deparamenti Amerikan është pajtuar që Demarkacioni të jetë përfundimtar. /tesheshi.com/
