Tensione në mbledhjen e kryesisë së PD-së. Forumi më i lartë politik është mbledhur për të nisur analizën mbi zgjedhjet, por debati ka precipituar mes sekretares për Organizatat Partnere, Valbona Mezini, e rreshtuar në grupimin anti-Basha, dhe Jemin Gjanës, që kryesoi proçesin e zgjedhjeve të brendshme në PD.
Shkaku i tensioneve, sipas burimeve nga PD, ishte fakti se Mezini ka ndërprerë disa herë Gjanën, i cili po fliste.
Mezini, sipas raportimeve, ka akuzuar Gjanën për deformimin e zgjedhjeve të brendshme në PD, gjë që duket se ka acaruar ish-ministrin demokrat.
Ky i fundit, sikundër raportohet nga një pjesë e anëtarëve të kryesisë, tentoi të godiste kolegen e tij, por nuk është lejuar nga disa prej të pranishmëve.
Por një tjetër variant është se Gjana nuk ka tentuar të godasë Mezinin, por është ngritur për t´u larguar nga mbledhja në shenjë proteste për mungesë rregulli.
Gjithsesi ajo që po kosntatohet çdo ditë e më shumë në selinë e PD-së është fakti se bashkëjetesa politike mes kundërshtarëve dhe mbështetësve të Lulzim Bashës pothuajse nuk ekziston, pavarësisht apeleve se palët duhet të bashkëpunojnë mes tyre. /tesheshi.com/
