Anijet amerikane janë drejtuar në ujërat e gadishullit Korean për të kryer stërvitje të përbashkët me Japoninë, duke nxitur tension në rajon. Peniani ka kërcënuar se do të fshijë nga faqja e dheut Amerikën, nëse kryen qoftë edhe një lëvizje të tepërt. Mes kësaj atmosfere presidenti kinez, Xi Jinping bëri thirrje për vetëpërmbajtje nga të gjitha palët.
Grupi luftarak u dërgua nga presidenti Trump për stërvitje në ujërat përreth gadishullit korean si një paralajmërim, mes frikës se Koreja e Veriut mund të zhvillojë një tjetër test bërthamor shumë shpejt, në një sfidë të hapur ndaj sanksioneve të Kombeve të Bashkuara.
Koreja e Veriut ka shtuar tonet e sfidës ndaj kësaj lëvizje.
“Shtetet e Bashkuara nuk duhet të nxitohen dhe të sillen në mënyrë të pakontrolluar, e duhet të konsiderojnë çdo pasojë katastrofike nga akti i pamend ushtarak provokues”, shkruhet në “Rodong Sinmun”, gazeta zyrtare e Partisë së Punëtorëve të vendit të izoluar komunist. “Ajo që vlen për agresorët janë viktimat dhe vdekjet”, lexohet më tej në gazetë.
Dy luftanije japoneze i janë bashkuar grupit goditës të Shteteve të Bashkuara për stërvitje në Paqësorin perëndimor, ndërsa Koreja e Jugut njoftoi këtë të hënë se është në bisedime për të zhvilluar gjithashtu stërvitje të përbashkët detare. /tesheshi.com/
