Kryebashkiakja e Shkodrës Voltana Ademi, gruaja që po bën “të fortën” në PD karshi njeriut me të cilin nuk pati paqë asnjë ditë të vetme, Edi Ramën, ka vendosur t’i ndalojë kryeministrit organizimin e një tubimi elektoral, e këtë duke “tundur në dorë” ç’dekretin e zgjedhjeve nga Meta.
“Bashkia e Shkodrës, në zbatim të dekretit të Presidentit të Republikës për anulimin e zgjedhjeve të 30 qershorit dhe në kuadër të mbarëvajtjes së sezonit turistik, nuk ka miratuar kërkesën e Partisë Socialiste për zhvillimin e një aktiviteti elektoral në Pedonalen e qytetit.
Bazuar në arsyetimin e mësipërm, në përgjigje të një shkrese të Komisariatit të Policisë Vendore Shkodër, Bashkia e Shkodrës ka vënë në dijeni për mosmiratimin e lejes për aktivitet elektoral të Partisë Socialiste.
Policia Bashkiake është e vendosur të realizojë detyrën e saj funksionale ligjore për garantimin e rendit dhe qetësisë publike në të gjithë territorin e Bashkisë së Shkodrës dhe për çdo shkelje, të veprojë në bazë të kompetencave dhe legjislacionit në fuqi.
Bashkëngjitur, komunikimi zyrtar i Bashkisë Shkodër”, thuhet në një deklaratë dalë prej zyrës së saj.
Rama në Shkodër shkon dy ditë pas në këtë qytet startoi operacioni politik i opozitës PD-LSI për të zhbërë, edhe me dhunë (siç), të gjitha KZAZ-të në qytetet ku ata drejtojnë bashkitë përkatëse.
Ndërkohë, basti i Ramës në këto zgjedhje ka qenë marrja e Shkodrës për herë të parë si bastion demokrat. /tesheshi.com/
