Mali i Zi, i vetmi vend në këtë pjesë të Ballkanit që deri më sot ka qëndruar i patrazuar, është përfshirë nga tensioni dhe trazirat. Opozita malazeze, e cila grupon rreth vetes një numër partish proserbe, pas disa protestave në fundjavë, që kulmuan me përplasje mes turmave dhe policisë, i ka dhënë ultimatum kryeministrit Milo Gjukanoviç për t’u larguar gjer në fund të javës.
Protestat zhvillohen pikërisht në kohën kur Mali i Zi do të pranohet si anëtar me të drejta të plota në NATO në muajin dhjetor. Ambasada e Rusisë në Mal të Zi, me anë të një komunikate, ka shfaqur hapur kundërshtimin e saj për hyrjen e Podgoricës në Aleancën e Perëndimit dhe ka mbështetur protestuesit.
Tensioni është rritur pas arrestimit të disa gazetarëve dhe anëtarëve të parlamentit, pjesë e grupimit opozitar. Ndërkaq sonte në darkë është paralajmëruar një tjetër protestë e madhe.
“Të shtunën, nëse nuk largohet Gjukanoviçi dhe nuk formohet një qeveri kalimtare, të gjithë do të vijnë këtu dhe ne do ta largojmë vetë qeverinë,” tha Andrija Mandiç, duke vënë në dukje se Fronti Demokratik ka një plan në bazë të vullnetit të popullit.
Mandiç, kryetari i Partisë Demokratike të Serbëve të Rinj, i bëri deklaratat e tij pas marshimit përpara 
Ministrisë së Brendshme.
Ndërkaq, BE-ja dhe SHBA-të kanë reaguar, duke kërkuar hetimet të paanshme për dhunën e policisë ndaj protestuesve në mitingun e së shtunës, ndërsa Moska ka shkuar edhe më tej, duke dalë me një deklaratë zyrtare të Ministrisë së Jashtme.
Edhe pse protestuesit nuk kanë thënë se protestat janë kundër NATO-s, Ministria e Jashtme ruse thekson në deklaratën e saj se, “hyrja e Malit të Zi në NATO nuk gjen konensus në shoqëri dhe mund të përçajë publikun”.
Lideri filoserb Mandiç deklaroi se mbrëmë u mblodhën mbi dhjetë mijë njerëz në shesh, ndërsa sipas vlerësimeve të policisë ishin dy mijë. Protestuesit mbanin në duar flamuj malazezë dhe serbë.
Tensioni u shtua gjatë kalimit të bulevardit “Shën Pjetër” dhe në afërsi të godinave së parlamentit dhe presidencës, të cilat ishin të rrethuara me forca të shumta policore. Ndërsa kolona ecte në bulevard, pati përleshje me policinë, e cila nga ana e saj hodhi gaz lotsjellës. Tensionet u rritën sërish para ndërtesës Ministrisë së Brendshme, pasi u hodhën gurë dhe shishe me molotov mbi policinë.
Pas njoftimit për një protestë të re, e cila do të nisë sonte, në ora 19:00, policia e shtetit ka përforcuar kontrollet në rrugët që çojnë drejt Podgoricës, bëjnë me dije mediat malazeze. Ndërkohë janë rritur masat e policisë edhe në rrugët nacionale. E përditshmja Vijesti, duke iu referuar burimeve të veta, thekson se do të kontrollohet çdo makinë që udhëton për Podgoricë. /tesheshi.com/
