Një anulim i papritur i takimeve të dy ministrave turq në qytetet gjermane me qytetarët e vendit të tyre ka shkaktuar tension mes dy vendeve.
Ministri turk i Drejtësisë dhe ai i Ekonomisë kishin planifikuar takime me komunitetin turk në Gjermani për t’u folur për referendumin e 16 prillit mbi ndryshimet kushtetuese. Takime që nuk do të kryhen për shkak të tërheqjes së lejes për to nga autoritetet gjermane.
I pritur aspak mirë nga Turqia, bllokimi i takimeve të ministrave turq është shoqëruar me thirrjen e ambasadorit gjerman në Ankara në Ministrinë e Jashtme turke, ku i është dorëzuar një notë proteste.
Veç kësaj, ministri turk i Drejtësisë, Bekir Bozdağ, ka anuluar në shenjë proteste vizitën në Gjermani, e bashkë me të ka anuluar dhe takimin me homologun gjerman, të kërkuar nga ky i fundit.
“Eshtë e papranueshme që autoritetet gjermane nuk po tolerojnë një miting të komunitetit turk, ndërsa i japin gjithmonë leksione çdokujt mbi të drejtat e njeriut, mbi demokracinë, mbi sundimin e ligjit dhe lirinë e shprehjes,” u ka thënë Bozdağ gazetarëve në Strasburg.
“E kam anuluar takimin tonë me ministrin gjerman të Drejtësisë… Ky takim nuk do të kryhet, do të kthehemi në Turqi,” ka bërë të ditur ai.
Ky nuk është rasti i parë kur autoritetet gjermane nuk i lejojnë shtetarët turq të takohen e të flasin para komunitetit të madh të qytetarëve të tyre në Gjermani. Presidentit Erdoğan nuk iu lejua një takim i ngjashëm në Këln pas përpjekjes së dështuar për grusht shteti të 15 korrikut.
Përndryshe, autoritetet gjermane kanë lejuar më herët figura kryesore të organizatës terroriste PKK të mbajnë fjalime para mbështetësve të tyre. Gjermania po ashtu është bërë strehë e anëtarëve të FETÖ-s, organizatës terroriste përgjegjëse për përpjekjen për grusht shteti në Turqi. /tesheshi.com/
