Mes Turqisë dhe Iranit ka shkëndija tensioni. Ambasadori turk në Teheran është thirrur në Ministrinë e Jashtme të Iranit, e në të njëjtën kohë ky vend i ka kërkuar Turqisë të mos ia vërë në provë durimin.
Nuk ka qëndruar duarkryq Ministria e Jashtme turke, që ka reaguar nëpërmjet zëdhënësit të saj. “Eshtë e pakuptueshme dhe e papranueshme që një vend i cili nuk ngurron t’i shtyjë refugjatët në fushën e betejës i akuzon të tjerët për paqëndrueshmëri dhe tension në rajon,” ka thënë dje zëdhënësi Hüseyin Müftüoğlu.
“Pritet nga Irani që të ndërmarrë hapa konstruktivë dhe t’i rishikojë politikat rajonale në vend të akuzimit të vendeve që e kritikojnë atë,” do ta mbyllte reagimin e tij zëdhënësi i diplomacisë turke.
Turqia u akuzua më përpara nga Irani nëpërmjet zëdhënësit të Ministrisë së Jashtme të këtij vendi për mbështetje të grupeve terroriste në Siri; një reagim shpagues ndaj kritikave të presidentit Erdoğan dhe të ministrit të Jashtëm turk, Çavuşoğlu, për nacionalizmin dhe sektarizmin iranian.
Kryediplomati turk do t’i kërkonte Iranit nga një konferencë në Gjermani që t’i jepte fund politikës sektare për hir të sigurisë dhe stabilitetit rajonal. Kurse presidenti Erdoğan raportohet të ketë thënë më herët në lidhje me politikat sektare të Iranit, sipas Daily Sabah-ut, se, “Në Lindjen e Mesme ka një nacionalizëm persian. Ne jemi kundër ndarjes së Sirisë dhe Irakut, por ka njerëz që e dëshirojnë një rajon të ndarë. Ne do t’u kundërvihemi këtyre përpjekjeve.” /tesheshi.com/
