John Bass, ambasadori i Shteteve të Bashkuara të Amerikës në Turqi, është thirrur dje në Ministrinë e Jashtme turke, ku i është shprehur pakënaqësia për deklarimet e zëdhënësit të Departamentit të Shtetit se PYD-ja nuk konsiderohet një organizatë terroriste.
Për thirrjen e ambasadorit amerikan të martën në Ministrinë e Jashtme dhe për atë që i është thënë atij në mënyrë eksplicite nga zyrtarët turq nuk jepen më tepër hollësi, por çka dihet me siguri është se ka një mospajtim të dukshëm mes dy vendeve në lidhje me forcat kurde që po luftojnë në Siri.
Turqia e quan një organizatë terroriste Partinë e Unionit Demokratik (PYD), degën siriane të PKK-së, e po kështu dhe YPG-në, krahun e saj të armatosur, dhe ka kërkuar me ngulm që edhe SHBA-të t’i vlerësojnë ato në të njëjtën mënyrë.
Por John Kirby, zëdhënësi i Departamentit të Shtetit, deklaroi të hënën se SHBA-të nuk e konsideronin PYD-në si një organizatë terroriste.
Qëndrimit të prerë të Erdoganit i është bashkuar dje dhe ministri i Jashtëm turk, Mevlut Çavushogllu, që ka deklaruar në një konferencë shtypi me homologun hungarez: “SHBA-të duhet të marrin një vendim: na zgjedhin ne si partnerë, apo organizatatat terroriste?”
Turqia dhe SHBA-të ndajnë pikëpamje të ngjashme mbi luftën në Siri dhe gjenden në të njëjtin front, por kanë mospajtim të thellë në lidhje me rolin dhe emërtimin e PYD-së dhe YPG-së, zgjatimeve të organizatës terroriste kurde PKK në Siri. /tesheshi.com/
