Lulzim Basha ka mbyllur mbledhjen me aleatët dhe ka përhapur lajme në media se marrëveshja po dështon dhe se Edi Rama është fajtori, pasi nuk pranon shtyrjen e datës 18 qershor.
Deri tani ka qenë Basha ai që pritej të jepte “ok” për paketën Mcallister, dhe më pas palët do të uleshin për të diskutuar pjesët me imtësi.
Por e vërteta është se Partia Demokratike nuk pranon klauzolën e paketës Mcallister për maksimumi 21 korrikun si datë zgjedhjesh duke insistuar për shtatorin.
Është pikërisht ky insistim i Bashës që po hedh në erë gjithçka, sipas burimeve brenda mazhorancës.
Ndërkaq, siç bën të ditur PD-ja, Basha do të dalë të flasë publikisht për sqaruar çështjen pas mbledhjes me aleatët.
Edi Rama nuk ka bërë asnjë tërheqje, pasi nuk ka thënë kurrë se do të pranojë shtyrjen e zgjedhjeve deri në shtator.
Ai ka deklaruar se është gati të negociojë për paketën McAllister, por nuk mund të shkelë afatet kushtetuese për zgjedhjet.
Paketa McAllister parashikonte që zgjedhjet maksimumi mund të shtyheshin deri më 16 korrik.
Pra gjithçka po sillet rreth datës së zgjedhjeve, dhe Basha kërkon ta bëjë fakt të kryer shtyrjen e tyre ndërkohë kur as Kushtetuta e as ndërmjetësimi europian nuk e parashikonte një gjë të tillë.
Kurse Rama nga ana e tij ka thënë se pranon të nisë diskutimin mbi paketën Mcallister, por duke shtuar se nuk mund të pranojë çdo gjë të atyshme.
Palët po bëjnë presione dhe siç duket gjithçka do të vijojë edhe nesër deri të enjten kur është afati i fundit si dhe vendimi i Kolegjit Zgjedhor.
Një aleat jo pak i rëndësishëm në opozitë, Partia Agrare e Agron Dukës ka bërë të ditur se do të marrë pjesë në zgjedhje.
Thoma Miço, nënkryetar i PAA-së, në një intervistë në Report TV ka deklaruar qartë se kjo parti i qëndron 23 korrikut.
“Ne nuk do të bëhemi vasal i askujt. Nëse krijohen probleme në personalitetin e partisë sonë atëherë PAA nuk ka pse të mbajë anën e askujt. Nëse plotësohen kushtet dhe kriteret e McAllister, PAA do të marrë pjesë në zgjedhje. Të gjitha debatet duhet të jenë në parlament. Zgjedhjet jo më larg se 23 korriku, maksimumi në 30 korrik. Më vonë jo, nuk është e përshtatshme”, u shpreh Miço. /tesheshi.com/
