Juventus arrin një fitore “monumentale” në Udine dhe afrohet sërish me Napolin e Interin. Djemtë e Alegrit kanë fituar me rezultatin 2-6 përballjen me Udinezen, edhe pse mbetën me 10 lojtarë që në minutën e 26-të të pjesës së parë, pas ndëshkimit për protesta të Manxukiç.
Për t’u shënuar në një ndeshje të komplikuar, është se asnjë nga 6 golat nuk u shënua nga sulmuesit.
Sami Khedira si asnjëherë më parë shënoi 3 gola, ndërkohë që 3 të tjerët u shënuan nga Rugani, Pjaniç dhe një autogol.
Seria A dhuroi edhe të tjera ndeshje emocionante. Roma arriti një fitore të vyer, ndonëse pa shkëlqim në Torino. Një goditje dënimi e Kolarov, para syve të idhullit të tij Mihajloviç, aktualisht trajner i Torinos, i dha 3 pikët kryeqytetasve.
Ngec sërish Milani përballë Xhenovas. Të mbetur që në mesin e pjesës së parë me 10 lojtarë, pas një kartoni të kuq të Bonuçit, çunat e Montelës nuk mundën të shkojnë më tepër se bardhësia e golave.
Fitore të rëndësishme arriti dhe Atalanta që mundi 1-0 Bolonjën, si edhe Fiorentina që fitoi 0-3 në fushën e Beneventos.
Seria A kryesohet nga Napoli me 25 pikë, i ndjekur nga Inter me 23 dhe Juventus 22 pikë. /tesheshi.com/
