Numri një i botës në tenis, Novak Djokovic, ka fituar dje turneun spanjoll Madrid Open. Në një finale elektrizuese, serbi ia ka dalë të mposhtë konkurrencën e Andy Murray-it, që ka luftuar gjer në topin e fundit.
Djokovic kishte eliminuar Nishikori-n në gjysmëfinale, ndërsa Murray do t’i ndërpriste Nadal-it serinë e gjatë të fitoreve në fushat me dhe të kuq gjatë këtij viti. Të dy finalistët do t’i fitonin me të njëjtin rezultat, 2-0, gjysmëfinalet.
Në takimin final, starti do të fliste i tëri për Djokovic-in, që në tridhjetë minuta e fitoi setin e parë 6-2. Britaniku do ta kthente lojën në setin e dytë, për ta fituar atë 6-3. Por nuk mundi të bënte më shumë në setin final, të fituar nga numri një i botës po 6-3.
Murray nuk arriti ta përsëriste suksesin e vjetshëm, kur fitonte 2-0 ndaj Rafa Nadal-it në finale. Ai gjithsesi është ndjerë mirë me paraqitjen e vet.
“Ju mbase nuk mund të fitoni çdo herë kur luani ndaj lojtarëve më të mirë. Por ju kërkoni t’i bëni ndeshjet jashtëzakonisht të vështira për ta, fizikisht dhe mendërisht. Unë mendoj se më së paku e bëra sot këtë, por fatkeqësisht nuk fitova.”
Humbja në finale e zbret britanikun në vend të tretë në renditjen botërore, duke ia lënë vendin këtë të hënë zvicerianit Roger Federer.
Ky ishte titulli i 29 Masters për serbin Djokovic, që ka lënë prapa Nadal-in, me 28 të tillë. Djokovic shihet si pretendenti numër një i Grand Slam-it të Roland Garros-it në Francë, edhe pse Nadal është ekspert në këtë lloj fushe tenisi. /tesheshi.com/
