Murray është fituesi i ATP World Tour Finals, një titull që i mundëson atij ta mbyllë vitin 2016 si numri një i botës në tenisin e meshkujve.
Ky ishte titulli i tij i parë në këtë turne, çka i dha fund serisë prej katër suksesesh të njëpasnjëshme të Novak Djokovic-it, njeriut të cilin e ka ulur dhe nga froni i numrit një.
Në finalen e luajtur në “O2 Arena” të Londrës, në prani të 17.000 ndjekësve të tenisit, Murray bëri një paraqitje të shkëlqyer ndaj serbit. Ai fitoi 2-0, me setet e mbyllura 6-3, 6-4.
Britaniku i kishte humbur 13 nga 15 takimet e fundit me Djokovic-in, një statistikë që nuk e pengoi të fitonte pastër një ditë më parë.
“Jam shumë i lumtur që fitova, dhe është shumë e veçantë të jesh numri një i botës,” deklaroi Murray, që fitoi të 24-n ndeshje radhazi, një rekord në karrierën e tij.
Andy Murray kishte bërë një tjetër paraqitje të shkëlqyer të shtunën. Në gjysmëfinalen ndaj kanadezit Raonic, ai do të fitonte 2-1; një ndeshje ekstremisht e luftuar, me setet në këto shifra, 5-7, 7-6, 7-6.
“Andy është përfundimisht numri një në botë. Ai meritoi të fitojë. Ai është lojtari më i mirë,” u detyrua të pohojë Djokovic, që shfaqi shenja të forta nervozizmi gjatë lojës. /tesheshi.com/
